Inatsisartut oqaluuserisassaat Siulittaasoqarfimmit saqqummiunneqarput
Inatsisartuni ilaasortat Inatsisartut upernaakkut ataatsimiinnissaannut oqaluuserisassatut siunnersuuteqarnissaannut ulloq tunniussivissaq kingulleq ukioq manna januaarip ulluisa 30-anni killeqarpoq, suullu oqaluuserineqartussatut siunnersuutigineqarsimanersut Inatsisartut nittartagaanni ullumi atuarneqarsinnaalerput.
Inatsisartut siulittaasuat Lars-Emil Johansen tusagassiuutinut taama nalunaaruteqarpoq.
Immikkoortut 103-t oqaluuserisassanngortinneqarput.
Inatsisartut oqaluuseritikkumasaat 60-iupput, Naalakkersuisullu oqaluuseritikkumasaat 37-ullutik. Inatsisartut Siulittaasoqarfiat oqaluuserisassanik pingasunik siunnersuuteqarpoq, Inatsisinullu Ataatsimiititaliaq ataatsimik saqqummiussaqarniarpoq, soorlu aamma Nunat Avannarliit Killiit Siunnersuisoqatigiiffiata kaammattuutitut aalajangersagai marluk oqaluuseritinneqarniartut.
Oqaluuseritinniakkat suunersut ullumi arfininngornermi ullup ilaani saqqummiunneqarumaartut nalunaarutigineqarpoq.
Inatsisartut upernaakkut ataatsimiinnissaat marsip ulluisa arfernanni aallartissaaq, pilersaarutillu naapertorlugit ingerlasoqassappat maajip ulluisa 28-ata tungaanut ataatsimiissallutik.
Sapaatip-akunnerata ingerlanerani ullut ataatsimiiffissat tassaapput marlunngorneq, pingasungorneq sisamanngornerlu, Inatsisartulli Poorskikkunni aamma sulinngiffeqarumaarlutik.
Pilersaarutit allat ilaatigut pissutaallutik ullut ataatsimiiffiusussaanngitsut arlaqaalupput, Naalakkersuisunullu sapaatip-akunnikkaartumik pisarneq malillugu apeqquteqartoqarsinnaassaaq, tamannalu pingasunngornerit tamaasa pisassaaq, ullaap tungaani aqqanerminngaanniit ulloqeqqata tungaanut apeqquteqartoqarsinnaassalluni.
Inatsisartut siunnersuutaat Inatsisartut nittartagaanni atuarsinnaavatit.
