Inatsisartut nutaamik ataatsimiittarfittaarnissaat suli kissaatigineqarpoq
![Inatsisartut Nuuk flag](/sites/default/files/styles/image_934x467/public/article_images/img_1423_1024.jpg?itok=LRYorUmk)
Inatsisartut nutaamik ataatsimiittarfittaarnissaat pillugu siullermik siunnersuutigineqarmat Inatsisartuni amerlanerussuteqartut akuersipput, Demokraatit kisimiillutik itigartitsillutik.
Tamatumali kingorna Inatsisartuni ilaasortat amerlanerusut isummatik allanngortippaat, sanaartornissamullu pilersaarutit unitsinneqarlutik.
Aamma atuaruk Taasititsinerup inernera erseqqissoq - Aqqaluup Aneerasaartarfianiissanngilaq
Taamaattoq aningaasanut inatsisissatut siunnersuut pillugu oqallittoqarnerani, Siumumi ilaasortap Jens Immanuelsenip Inatsisartut ataatsimiittarfissaat pillugu suliap aallartinneqaqqinnissaa kissaatigaa.
- Ukiut marluk matuma siorna Inatsisartut aalajangernikuupput Inatsisartut ataatsimiittarfissaata sananeqarnissaanut pilersaarusiorlugu aallartinneqassasoq. Suliaq taanna uninngasutut isikkoqarmat aningaasanut inatsit oqaasertaatigut aaqqiivigineqaqqullugu, Jens Immanuelsen oqarpoq.
Inatsisartut ullumi ataatsimiittarfiat pitsaasuunngitsoq nutaamillu sanasoqartariaqartoq, Immanuelsen isumaqarpoq.
- Uku illorsuit pisoqarsuit, ilaatigut peqqissutsimut naammagineqanngitsut ukiuni aggersuni atuinnarnissaat apeqquserneqartariaqarpoq, Jens Immanuelsen oqarpoq.
Aamma atuaruk Taasisoqareersoq: Sanaartornissaq unitsilli
Oqaluuserineqartariaqarpoq
Partiillu oqaaseqaataani tamanna qaqimmagu, Inatsisartut aningaasaqarnermut ataatsimiititaliaanni ataatsimiittarfiliornissamut aningaasaliisoqassanersoq oqaluuserineqartussanngorpoq.
Tamannali partiinit naalakkersuisuutitaqartunit allanit Demokraatinit akerlerineqarluinnarpoq.
- Uagut arlaannaanilluunniit sunniisinnaagutta, Inatsisartut ataatsimiittarfissaannik nutaamik sanasoqarnavianngiivippoq. Naamerluinnaq. Taanna akuerisinnaanngilluinnarparput, Tillie Martinussen oqarpoq, aningaasallu allamut atorneqarsinnaasut erseqqissarlugu.
Aamma atuaruk Steen Lynge: Aqqaluup Aneerasaartarfia ataatsimiittarfiliorfiginagu
- Inatsisartut ataatsimiittarfissaannik nutaamik sananissamut aningaasat pissarsiarineqarniartut, meeqqanut inuusuttunullu atussavavut. Meeqqammi inuusuttullu ajunnginnermik atugarisaqartinnerulernissaannut annertuumik suliassaqarpugut. Inatsisartut ataatsimiittarfissaannik nutaamik sanasoqarnissaanut qanorluunniit pisoqaraluarpat ilaanianngilagut, Tillie Martinussen oqarpoq.