Inatsisartut: Meeqqat atugaat oqaluserineqassapput
Inatsisartut ullumi ataatsimiilerunik nunatsinni meeqqat atugaat oqaluuserissavaat.
Palle Christiansen illuatungiliuttuni Demokraatineersoq Meeqqanut siunnersuisooqatigiinnik pilersitsisoqarnissaanik siunnersuuteqassaaq.
Tamannalu piviusunngussagaluarpat Meeqqanut siunnersuisooqatigiit meeqqat pisinnaatitaaffii qulakkeerniartassavaat, meeqqanullu tunngatillugu paasissutissiisoqartarlunilu meeqqat atugaat pillugit apeqqutinut pisortanut siunnersuisassapput.
Demokraatilli taamatut siunnersuuteqarnerat Naalakkersuisuniit itigartitsissutigineqassasoq oqaatigereerneqarsinnaavoq. Naalakkersuisummi siunnersuummut akissuteqaamminni allapput, maannakkut nunatsinni Meeqqanut Siunnersuisooqatigiinnik pilersitsinissamut maanna piffissaanngitsoq, aningaasaliissutaareersut atorlugit suliniutinut toqqaannartumik meeqqat, inuusuttut ilaqutariillu ajonartorsiutaannut aalajangersimasunut aningaasat atorusunneruneqarmata.
Innarluutillittaaq atugaat inatsisartuni ullumi oqallisigineqassapput. Siumumeersup Ruth Heilmannip siunnersuutigissavaa, Autisme-mik Aspergers syndromeqartunullu innarluuteqartunut ilisimasanik katersuiffimmik pilersitsisoqarnissaa.
Taamatuttaaq Demokraatineersup Astrid Fleischer Rexip tamatuma misissuiffigineqarnissaa kissaatigaa, taamaalilluni atukkat pitsaanerulernissaannik periarfissiisoqarsinnaaqqullugu.
