Innuttaasut akiliisariaqalerput: Inatsisartut iliuuseqartariaqarput
Innuttaasut akilersuuteqartussat meeqqanut akilersuutinik akiliinngikkaangata kommunit akilersuutinik pisussanut akiliigallarnissamik inatsisitigut pisussaaffeqarput. Taamaattoqarneralu Qeqqata Kommuniata aningaasaqarneranut artukkiivoq.
Inatsisip taamaannerata kinguneranik Qeqqata Kommuniani innuttaasut meeqqanut akilersuutinut, nammineq akilerneqanngisamannik, 59 milliuunit koruuninik akiitsoqartut kommuni ilisimatitsivoq.
Akiitsut taakku ukiup ataatsip iluani 3 milliuunit koruuninik amerlisimapput, Inatsisartullu iliuuseqanngippata amerliartuinnassapput. Tamanna Qeqqata Kommuniani borgmesterip pissusissamisoorsorinngilaa.
- Taamatut inatsisitigut peqqussusiorsimaneq kommuninut innuttaasunullu aningaasatigut akisoorujussuunera artukkiineralu isiginngitsuusaaginnarsinnaanngilarput, tamannalu inatsisiliortutta piaartumik qanoq iliuuseqarfigisariaqarpaat, Malik Berthelsen allappoq, nangillunilu;
AAMMA ATUARUK Randi vil inddrive gæld med stramninger
- 59 milliuunit koruunit aningaasarpassuupput innuttaasut pisariaqartitaannut soorlu meeqqeriviliornermut, inissialiornermut imaluunniit meeqqanut inuusuttunullu suliniutinut atorsinnaagaluartut.
Qeqqata Kommuniani kommunalbestyrelsi innuttaasut inuunerannut toqqaannartumik akuliukkusunngillat, taamaakkaluartoq innuttaasut namminneq iliuutsiminnut akisussaasut assersuutigalugu kissaatiginngisamik meerartaartarneq angajoqqaalluunniit inooqatigiikkunnaaraangata nammineq akisussaaffigineqartartoq kommunal bestyrelsi isumaqarpoq.
- Taamaattumik ilungersortumik inatsisiliortunut piumasaraarput peqqussutip pineqartup atorunnaarsinneqarnissaa suliareqqullugu, taamaaliortoqanngippammi akiitsut naassaanngitsumik qaffakkaluttuinnassapput, tamannalu inuiaqatigiittut akissaqartinngilarput, borgmesteri Malik Berthelsen allappoq.
Nunatsinni innuttaasut meeqqanut akilersuutinik akiliisimanngitsut 2016-imi 344 milliuunit koruuninik akiitsoqarput.