Inatsisartut ataatsimiittarfitsik naammagiinnarallartussanngorpaat
Aningaasanut inatsisissaq aappaagumoortoq 300 millioni koruunit angullugit amigartooruteqartussanngorlugu Inatsisartuni Siumup, Atassutip, Inuit Ataqatigiit Kattusseqatigiillu partiiata ippassaq akuersissutigaat. Akerliullutik taasipput Demokraatit. Sukkullit, imigassat tupallu akitsuutaasa qaffannerisigut isertitassat amerleriaataat 100 millioni koruunit ilaareeraluartut, 300 milliuningajalluinnaat amigartoorutaassasut nalunaaquttap akunneri pingasut oqallisereerlutik 19-riarlutillu taasereerlutik inatsisartuni amerlanerussuteqartut aalajangerpaat.
Aningaasanut inatsisssap akuerineranut atatillugu inatsisartut ataatsimiittarfiata allinissaa kinguartinneqarpoq, atuarfiit, isumaginnittoqarfiit isumassuiffiillu iluarsaannissaat allilernissaallu salliutikkusunneqarmat.
Inatsisartulli partiillu allaffii amerlanerusut pisariaqartinneqarmata amingaatigineqartut attartornikkut pissarsiareriarneqassapput. Landskarsip suliniutinut nutaanut aningaasaliissutissai 8 millioni koruuninik ilaneqarput. Ilaqutariinnut aningaasaliissutit amerleriaataat ukiumi tulliuttumi ilaqutariit ajornartorsiortut atugaasa pitsanngorsarnissaannut atorneqassapput qanorlu atorneqassanersut inatsisartut upernaaru ataatsimiilerpata, naalakkersuisunit siunnersuuteqarfigineqassaaq.
