Inatsisartut ataatsimiittarfimminniissinnaanngoqqilerput
![](/sites/default/files/styles/image_934x467/public/article_images/efterarssamling_630_0.jpg?itok=wgLC7MZm)
Plastikki illersuut Inatsisartut ataatsimiittarfianni nerrivinniit issiavinniillu maanna peerneqarsimalerpoq, qaammatini arlalinni atareerluni. Ataatsimiittarfik Inatsisartut ukiaanerani ataatsimiinnissaannut taamaalilluni piareerpoq.
Politikkikkut tamaviaarneq kingulleq ukioq-manna septembarip ulluisa 16-ianni pissaaq.
Inatsisartunummi ilaasortat ukioq-manna ataatsimiinnermik aappassaa naggataarlu ulloq taanna aallartissavaat. Annaassisitta Oqaluffiani naalagiarnermik pisarnertut aallartissallutik.
Inatsisartut siulittaasuata nutaarsiassaqartitsiviani tamanna erserpoq.
Annaassisitta Oqaluffiani naalagiaqatigiinnerup kingorna Naalakkersuisut siulittaasuat, taamanikkut suli Kuupik Kleistiussagunartoq, ammaanersiorsiorluni oqalugiassaaq, Nunatta killiffia saqqummiullugu.
Upernaakkut ataatsimiinneq, Inatsisartut ataatsimiittarfianni oqoqarnera ernummatigineqarmat, Kommuneqarfik Sermersuup ataatsimiittarfiani naammassineqaraluartoq, ukiaanerani ataatsimiinneq inimi sungiusimasami pissaaq.
Inatsisartut ataatsimiittarfiat piareersimavoq, ataatsimiittarfimmilu nerriviit, issiaviit allallu qaammatini kingullerni plastikkimik assersorneqarsimagaluarput, plastikkilli maanna piiarneqarsimalersut, Inatsisartut allaffeqarfianni pisortaq, Ellen Kolby Chemnitz, KNR-imut oqarpoq.
Ellen Kolby Chemnitzip aamma ilisimatitsissutigaa, oqoqarneranik ernummateqarneq pissutissaqarsimanngitsoq, isugutammik aasoqaannarsimammat.
Ukiaanerani ataatsimiinneq qanoq sivisutigissanersoq nalunarallarpoq, ullormummi oqaluuserisassanut siunnersuutinik tunniussinissamut ulloq kingulleq tassaavoq aggustip ulluisa aqqaneq-aappaat.