Inatsisartut ataatsimiinneri tulleriit qaleriingajattut

Inatsisartut ukiuunerani ataatsimiinnerat upernaakkullu ataatsimiinnissaat malisungaannassapput. Inatsisartunut ukiarmi qinersisimaneq tamatumunnga pissutaaqataavoq. Ataatsimiinnerit qaleriingajannerat Inatsisartuni sulinermut sunniuteqarnersoq Inatsisartut siulittaasuannut Jonathan Motzfeldtimut paasiniarparput, imalu akivoq:

-Ilumoorpoq qaleriingajalluinnarput, tassani pissutsit assigiinngitsut peqqutaasimasut nalunngilagut, tassalu qinersineq Aningaasallu Inatsisaata akuerineqarnissaa.

Jonathan Motzfeldt oqarpoq inatsisartut ataatsimiinnissaannut tullermut pilersaarusiorneq pissusissamisut ingerlasoq. Inatsisartuni ilaasortat siunnersuutissaat tigoorneqarput, tunniussivissarlu tunngavigalugu naammassippata ataatsimiinnissami ullormut oqaluuserisassat inissitsiterneqassapput.Inatsisartuni ilaasortat siunnerluuteqarluartut inatsisartut siulittaasuat oqarpoq.

- Partiit maannakkut piareersarluartarneri malunnarsiartorput aammalu inunnit ataasiakkaanit pivallaaratik kisianni partiininngaanniit siunnersuutit saqqummertarnerat sungiukkiartornerulerparput. Taamallilluni kina qaqugu sumilu naapissasut partiit allafeqarfii ikiortigilluarlugit pilersaarusiornerata maannakkut ingerlalernera tamatta malugusuutigaarput.

Inatsisartut ukiumut pingasoriarlutik siornagut aamma ataatsimiitinneqartarsimapput, tamannali qaqortigoortuusoq Jonathan Motzfeldt oqarpoq.

- Massakkut pisunut atatillugu allaassutigaa maannakkut piareersarneri, partiit allaffeqarfiisa nukittorsarneqarnerisigut, pilersaarsiornerit oqinnerusumik eqaannerusumik aammalu erseqqissumik; sunarpiaq pineqarnersoq, maannakkut tamakku Inatsisartuni ilaasortanit nutaanit sungiukkiartorneqartut malunnarpoq. Suleriaaserlu taanna siunissami aalajangiusimaniarsarissavarput.

Inatsisartut ukiuunerani ataatsimiinnerat marsip 23-iani naammassineqassaaq upernaakkullu ataatsimiinnerat apriilip 21-ianiit aallartissaaq.