Inatsisartut ataatsimiinnerat unikkallarpoq

Inatsisartut ataatsimiinnerat nalunaaqutaq tallimanut tanneq arfineq marlunngulersoq unitsinneqarpoq, taamaalillunilu raajanut nalunaarutip oqallitsitsinera imaannanngitsumut saalerunarpoq, Naalakkersuisut siulittaasuat Hans Enoksen Inuit Ataqatigiit uteriisernerat pillugu oqarmat:

- Inatsisartut inatsisilerituui Inatsisartullu Siulittaasoqarfiat inatsisaatsuliortutut pasineqarput, akuersaarsinnaanngilluinnarpara partiip naalakkersuisooqatitta uatsinnut inatsisaatsuliorneraanera, tamanna imaannaanngitsorujussuuvoq, taamaattumillu piumasarissavara Ataatsimiinnerup massakkut unitsikkallarneqarnissaa. Hans Enoksen taama oqarpoq.

Raajanut nalunaarutip ilungersunartumik oqallisigineqarnerani Inuit Ataqatigiit isumartik aalajangiusimavaat, tamannalu pissutigalugu partiit Naalakkersuisooqatigiittut pingasut akornanni annertuumik avissaartuuttoqalernera malunnarsivoq. Ataatsimiinneq aallarteqqippat paasinarsissaaq Inuit Ataqatigiit naalakkersuisooqatigiinnermi qanoq inisisimalersimassanersut, tassami Atassut Siumullu isumaqatigiipput.

Inatsisartut ataatsimiinnerat talimat missaanni aallarteqqikkaluarpoq, kinguninnguali aamma uneqqilluni. Naalakkersuisut siulitaasuata, Hans Enoksenip Atassut maanna ataatsimeeqatigilerpaa.