Inatsisartut ataatsimiinnerat aallartissaaq
Nunatsinni pinerluuteqarsimasut singernermikkut nalunaarsuuteqarlutik angerlarsimaffimminni pineqaatissinneqartarnissaat, Polaoil KNI-mit avissaartinneqarnissaa aammalu pinerluttulerinermut eqqartuussiveqarnermullu inatsisinik allannguinissamik ilaatigut siunnersuuteqartoqarpoq.
Naalakkersuisup siulittaasua Aleqa Hammond aperaarput inatsisissatut siunnersuutit sorliit pingaarnertut isiginerai.
- Ilaqutariinnermut naalakkersuisup siunnersuutigisassai inuussutissarsiornermut naalakkersuisup suliassaqarfianut sunniuteqassapput, inuussutissarsiornermullu naalakkersuisup siunnersuutigisassai aalisarnermut naalakkersuisup suliassaqarfianut aamma sunniuteqassallutik. Tamarmik ataqatigiipput, taamaammat aamma sulinitsinni ataqatigiissitsinissarput pingaaruteqarpoq, Aleqa Hammond taama oqarpoq.
Aleqa Hammond isumaqarpoq suliffissaaleqineq akiorniarlugu Inuussutissarsiornermut Aatsitassarsiornermullu Naalakkersuisoq aamma Aalisarnermut Piniarnermut Nunalerinermullu Naalakkersuisoq ulapputissaqartut.
Ilaqutariinnermut Inatsisinullu Atuutsitsinermut Naalakkersuisup Martha Lund Olsenip inatsisissatut siunnersuutaa siullertut saqqummiunneqassaaq.
Siunnersuutip pingaarnertut siunertaraa meeqqat pisinnaatitaaffii nukittorsarneqassasut. Siunnersuummi tassani pingaartinneqarpoq meeqqat sumiginnarneqarnissamut uloriarnartorsiortut pilertortumik iliuuseqarfigineqarsinnaanissaat.
Aamma kommuneqarfimmi suliassanik ingerlatsisut taamaalillutik meeqqanut taakkununnga iliuuseqarsinnaanerat annertusissaaq. Ilaqutariinnemut Naalakkersuisup inatsisissatut siunnersuutimi tigulluarneqarnissaa neriuutigaa.
- Oqallittoqarluarnissaa soorunami naatsorsuutigaara aammalu Inatsisartut ataatsimiititaliarlu peqatigalugit inatsisissatut siunnersuut naammannersoq imaluunniit allanik erseqqissagassaqassanersoq eqqartussagipput naatsorsuutigaara. Inatsisissatut siunnersuut ukiuni arlalinni suliarineqarpoq aammalu oqartussaasoqarfiit arlallit peqatigalugit suliarineqarsimalluni.
Naalakkersuisut siulittaasuata Aleqa Hammondip Naalakkersuisut Inatsisartullu partiimut sorlermut attuumassuteqarneq apeqqutaatinnagu suleqatigiilluarsinnaanissaat neriuutigaa. Tamanna pingaaruteqartoq oqaatigaa nangillunilu:
- Tamatuma saniatigut aamma soorunami neriuutigaara ataatsimiinneq ingerlalluarumaartoq, tamattalu Kalaallit Nunaata nukittunerusumik inissisimalernissaannut akisussaaffimmik tiguseqataassasugut.
Inatsisartut upernaakkut ataatsimiinnissaat ullumi marsip ulluisa 18-ianni aallartissaaq. Aasarulu junip ulluisa tallimaanni ataatsimiinneq naammassissalluni.
