Sulisartut utoqqaligaangamik soraarnerussutisiatik aatsaat tigusinnaalersaraat, Inatsisartunulli ilaasortanut amerlanernut tamanna allaavoq. Inatsisartut ukiuunerani ataatsimiinneranni akuersissutaavoq Inatsisartunut ilaasortat 50-inik ukioqalereeraangamik soraarnerussutisiaqalersinnaanissaat.
Inatsisartunut Naalakkersuisunullu ilaasortat 50-inik ukioqalereersimasut apriilip aallaqqaataaniit soraarnerussutisiassat isertitatut akileraarutaasussatut tigusinnaalissavaat. Soraarnerussutisiassat pineqarsinnaalersut Inatsisartunut ilaasortanut qaammammut 1450-koruuninik amerlassuseqartut, Naalakkersuisunut ilaasortanut 3000-koruunit missaannik amerlasuuseqarput.
Inatsisartunut ilaasortat amerlanerusut siunnersuummut akuersisut Demokraatit akerliupput:
Esmar Bergstrøm Demokraatineersoq isumaqarpoq inuiaqatigiinni innuttaasut tamarmik soraarnerussutisiassatigut assigiimmik pineqartariaqartut:
-Uagut akerliuvugut isumaqaratatta inatsisartunut ilaasortat immikkut ittumik soraarnerussutisiassatik maanna 50-inik ukuiqalereersimasunut akissarsianut tapiliussatut tunniunneqartarlernissat akerlerigatsigu. Esmar Bergstrøm aamma isumaqarpoq Inatsisartut taama immikkut pineqarnerisigut inuiaqatigiinni inuit aamma taamatut piumasaqalersinnaasut.
- Uagut immikkoortitserusunngilagut isumaqaratta inuit tamarmik assigiimmik pineqartariaqartut, Esmer Bergstrøm oqarpoq.
Inatsisartunut ilasortanut 52-ileeresimasunut inatsit periarfissiivoq ukiut marluk soraarnerussutisiassatut katersanik pisinnaalernermik.
Tassa ukiut marluk kingulliit Inatsisartunut ilaasortaasimagaanni 52-illu sinnerlugit ukioqaraanni 70.000 koruunit missingi apriilip aallaqqaataani pineqarsinnaalissapput.