Inatsisartunut ilaasortat allanik taasissussisartut kinguneqartinneqassanngillat
"Taamaakkaluarpalluunniilli allanik taasissussineq Inatsisartut suleriaasiannik taamatullu Inatsisartut Naalakkersuisullu pillugit inatsisartut inatsisaannik unioqqutitsinerummat qularutissaanngilaq.
Inatsisartulli suleriaasianni inatsisartulluunniit naalakkersuisullu pillugit inatsisartut inatsisaanni maleruagassat unioqqutinneqarpata “pillaanissamut” periarfissaqartoqanngilaq Inatsisartut siulittasuat Ruth Heilmann inatsisartut siulittaasoqarfiani ilaasortat ataatsimiinerisa kingorna tusagassiuutinut nalunaaruteqarluni allappoq.
Misissuinermi inerniliisoqarpoq inatsisartunut ilaasortaq allanik taasissussisimasoq pinerluttulerinermut inatsimmi aalajangersakkanik unioqqutitsisisutut eqqartuunneqassasoq ilimagineqarsinnaanngitsoq, inatsisartut siulittaasuta Ruth Heilmann oqarpoq.
Taasinermi maleruagassanik unioqqutitsinertut pisut sakkortuumik uparuassallugit Inatsisartut Siulittaasoqarfiat pissutissaqarpoq. Suliassaq suliamut akuusunut allatigut kinguneqaateqassanersoq Inatsisartut Siulittaasoqarfiata oqartussaaffiginngilaa, tamannalu qinersisartut naggataatigut aalajangigassarissallugu inatsisartut siulittaasuat Ruth Heilmann tusagassiuutinut nalunaaruteqarluni taamatut allappoq.
Inatsisartut Siulittaasoqarfiata taasisarnermut maleruagassat malinneqaqqullugit erseqqissarneqarpoq, taamaaliortoqqannginnissaalu kissaatigalugu.
Inatsisartut aamma siulittaasoqarfiup sulissutigisaanik Inatsisartut Suleriaasiat ukiut nikinnerannit atuutilersussamik allannguuteqartippaat. Allannguut taanna atorlugu inatsisartunut ilaasortaq pineqartoq Inatsisartut pissuserissaarnermut maleruagassaannik sualuttumik unioqqutitsippat ullut ataatsimiiffiit 14-t tikillugit sivisussusilimmik Inatsisartut ilaasortaat ataatsimiinnerini peqataaqqusaajunnaarsissinnaavaa. Inatsisartunut ilaasortaq peqataaqqusaanngitsoq piffissami peqataanngiffimmini aningaasarsiaqartinneqassanngitsoq inatsisartut suliariaasissaat nutaaq ukiortaamit atuutilersussaq pillugu inatsisartut siulitaasuat Ruth Heilmann allappoq.
