Inatsisartuni ullormut pisussat
Aningaasaqarnermut Akileraartarnermullu naalakkersuisup Aqqaluaq B. Egedep oqaluuserisassatut saqqummiussassaa immikkut maluginiassanut ilaavoq. Aningaasanummi inatsisissap aappaagumoortup aappassaaneerneqarnissaata kinguartinneqarnissaa Aqqaluaq B. Egedep saqqummiutissavaa, naalakkersuisummi nikinnerat pissutaalluni aningaasanut inatsisissatut siunnersuummut allannguutissat suliarineqarnissaannut naalakkersuisunngoqqammersut piffissaqarfigerusuppaat.
Taassuma saniatigut immikkoortut allat ilaatigut tassaapput uumasoqatigiinnik avataaniit eqqusseqqusinerup malittarisassaqartitaanerata pillugu inatsimmut allannguutissut siunnersuut, aalisarnermut piniarnermullu naalakkersuisumit saqqummiunneqartussaq, soorlu aamma qimmit qimuttut kiisalu qimmeqarneq pillugu inatsimmut allannguutissatut siunnersuutit saqqummiunneqassasut.
Sermip erngullu avammut nioqqutissatut atorneqarnissaat pillugu inatsimmut allannguutissatut siunnersuutit, suliffeqarnermut naalakkersuisumit saqqummiunneqassapput.
Nunatta karsiata 2015-imut naatsorsuutaasa Inatsisartunit aamma akuersissutigineqassapput, Air Greenlandip nunatta tamakkiisumik pigisariaqarneranik, nunattaluunniit piginneqataassutaasa 37,5 procentiusut tunineqarpata tamanna nunatsinnut imminut akilersinnaanerunersoq pillugu apeqquteqaat aallaavigalugu oqallisissiaq oqaluuserineqartussanut aamma ilaalluni.
