Inatsisartuni ullormut pisussat

Inuit Ataqatigiinneersup Mimi Karlsenip Ilisimatusarfimmi tusagassiortunngorniartut atuartinneqarnerisigut oqaatsitigut piginnaasat qaffassarnissaasa salliutinneqarnissaannut Inatsisartut aalajangiiffigisassaattut siunnersuutaa siulliunneqassaaq. Tusagassiortunngorumaartussat oqaatsitsinnik atuinerisa nukittorsarnissaa siunertaavoq.

Immikkoortut aappaat Mimi Karlsenip aamma siunnersuutigaa, taassuma Naalakkersuisut kaammattorpai Nunatsinni tusagassiuutini kalaallisut oqaatsitta atorluarneqarnerulernissaat sulissutigeqqullugu.

Anthon Frederiksenip Partii Naleqqameersup atorfimmut atatillugu inigisap sivikinnerpaamik ukiuni tallimani attartoreerneratigut attartortup nalinginnaasumik attartukkatut inigilersinnaalersinnissaa siunnersuutigaa.

Inuit Ataqatigiinneersup Múte Bourup Egedep inuusuttut 16-init 29-nik ukiullit ilanngullugit suliffissarsiortutut allatsissimasut, ilinniagaqalernissaat suliffittaarnissaallu siunertaralugu Naalakkersuisut immikkut ittumik pilersaarusiornissaannik siunnersuuteqarpoq, pilersaarut taanna 2014-imi upernaakkut ataatsimiinnermi saqqummiunneqartussatut siunnersuutigaa.

Immikkoortut tallimaat Siumut Inatsisartuni ilaasortaatitaata siunnersutigaat. Inuusuttut Inuiaqatigiinni Kiffartuussisarnerisa 2007-mi atorunnaasinneqartup eqquteqqinneqarnissaanut Naalakkersuisut periarfissarsiornissaannik peqqullugit siunnersuuteqarput. Inuusuttut akornanni suliffissaaleqinerujussuup akiorniarneqarneranut atatillugu taamaaliortoqassaaq.

Immikkoortut kingullersaattut eqqumiitsuliortunik tapersersuisussamik eqqumiitsuliornermut aningaasaateqarfimmik pilersitsinissaq oqaluuserineqassaaq. Inuit Ataqatigiinneersoq Peter Olsen siunnersuuteqartuuvoq, taassuma aamma eqqumiitsuliornermut isumalioqatigiissamik aningaasaliissutinik agguaassinissamik isumaginnittussamik pilersitsinissaq siunnersuutigaa.

Inatsisartut ataatsimiinnerat nalunaaqutaq qulinut aallartissaaq KNR-kkullu malinnaavigineqarsinnaalluni.