Inatsisartuni ullormut pisussat
Ullormut oqaluuserisassani immikkoortoq siulleq tassaavoq isumaginninnermi malittarisassanik kommunit aqutsinerannik atorunnaarsitsisinnaaneq pillugu inatsit assortuussutaasoq. Kommunit isumaginninnermi sulianut tunngatillugu aalajangiisinnaassuseqarnerat inatsimmi peerneqassaaq.
Kommunit kattuffiannit Kanukokamit inatsit pisariaqanngikkaluartoq oqaatigineqarpoq. Tamanna kattuffiup siulittaasuata siornatigut oqaatigereerpaa maannalu aamma taamaalioqqilluni:
- Inatsit taanna pisariaqanngilaq, Namminersorlutimmi Oqartussat angalaartitaasa inunnit piffinni najugaqartunit suliassat pitsaanerusumik ingerlassinnaanngikaat isumaqarpunga, Kanukokap siulittaasua, Palle Jeremiassen, Sermitsiamut ullumi taama oqarpoq.
Naalakkersuisulli Martha Lund Olsenip inatsisissatut siunnersuutaata akuersissutigineqarnissaa ilimanartupilussuuvoq.
Tamatuma saniatigut ilinniarnerup nalaani ernialersuisarnermik atuutsitsilerneq aamma ilinniarnermi taarsigassarsianik
akilersuinissamut maleruaqqusanik allannguineq erseqqissaanerlu pillugit inatsisissatut siunnersuut Inatsisartuni oqaluuserineqassaaq.
Inuk pillugu paasissutissanut inatsit aamma Inatsisartunut ilaasortat illuatungiliuttuneersut siunnersuutaat arlallit oqaluuserineqassapput.
Taakku ilagaat Inuit Ataqatigiinneersup Kalistat Lundip siunnersuutaa, Tele-Postimi piginnittuunermut periusissiamik pilersitsinissamut tunngassuteqartoq. Radioaviisimi ippassaq oqaluttuarisatsitut taamatut siunnersuuteqartoqarneratigut Nunatsinni nalunaarasuartaateqarnermik ammanerulersitsinissamik sulissutigineqartoq unitsinneqartussatut isikkoqarpoq.
