Inatsisartuni ullormut pisussat
Inatsisartut nalunaaqutaq ataatsimut aallarteqqikkunik siullugu oqaluuserisassaat tassaavoq, inuit pisisinnaatitaaffii pillugit sullivimmik taamatullu naligiissitaaneq pillugu aalajangiisartunik pilersitsisoqarnissaanik Naalakkersuisut peqquneqarnerannut siunnersuut. Taanna upernaaq Inatsisartut ataatsimiinneranni siullermeerneqarpoq.
Inuit Ataqatigiit tamanna pillugu siunnersuutaanni allassimavoq, Nunatsinni Inuit piginnaatitaaffii pillugit siunnersuisooqatigiit ullumikkut qullersaqarfiat taamatullu naligiissitaaneq pillugu aalajangiisarfissap akisussaaffii, inuit pisisinnaatitaaffii pillugit sullivissap akisussaaffigilissagai.
Oqaluuserisassat allat pingasut tassaapput siullermik, højskolet pillugit oqallinissamik siunnersuut. Tassani eqqartorneqassalluni, højskolet ingerlatiinnarnissaat anguniarlugu politikkikkut qanoq tamanna ikorfartorneqarsinnaanersoq.
Tulliullugit oqaluuserineqassapput, pisortanit ikiorsiissutinut malittarisassat qanoq sukaterneqarsinnaanersut pillugu siunnersuut aamma ujaqqat erlinnartut Nunatsinni piiarneqarsimasut maani sileqqaarlugit nunanut allanut anninneqartarnissaannik piumasaqaat.
Oqaluuserisassaat taakku saniatigut siunnersuisooqatigiinnut aalajangiisartutullu ataatsimiititaliaata ilaasortassaannik qinesisoqassaaq, tamannalu pissaaq ataatsimiinnermi matoqqasumi.