Inatsisartuni taasisitsisarnerit sukateriffigilerpai
Inatsisartunut ilaasortat taasisitsisarnerni unioqqutitsisarsimasutut pasillerneqarnerisa kingorna Inatsisartut siulittaasoqarfiat inatsisartuni taasisitsisarnerit pillugit sukaterilerpoq.
novembarip 12-at 2008 16:54
Ullumikkut Inatsisartuni taasisitsisoqaraangat taasinerit sivisunerulaartarput, taasinerni kikkut taasisinnaatitaanersut qulakkeeqqaarniarneqartarmat. Inatsisartuni suleriaaseq ukiortaamiit allanngulaartussaavoq, Inatsisartunut ilaasortat oqaluttarfimmukaqqaaratik issiavigisaminniit naatsumik oqaaseqartinneqartalertussaammata.
Inatsisartunut ilaasortat taasisitsinerni unioqqutitsisarsimanerat pillugu Inatsisartut siulittaasoqarfiat annerusumik iliuuseqarumanngilaq, taaseriaatsimik akuerisaanngitsumik atuisoqarnera pillugu naammagittaalliuutinik Siulittaasoqarfik tigusaqarsimanngimmat:
- Naammagittaalliuutinik tigusaqarutta pisoq pillugu Siulittaasoqarfimmit naliliisoqartarumaarpoq, Inatsisartut siulittaasuat Ruth Heilmann oqarpoq.
