Inatsisartuni sisamanngornermi pisussat

Aningaasarsianit akileraarutit pillugit inatsimmut allannguutissatut siunnersuut Aningaasaqarnermut Akileraartarnermullu naalakkersuisup Aqqaluaq B. Egedep siullertut saqqummiutissavaa.

Taamaalereerpat Partii Naleraq sinnerlugu Inatsisartunut ilaasortap Per Rosing-Petersenip Nunatsinni nioqqutissat akiisa OECD-mi inuussutissat akiisa agguaqatigiissinnerinut naleqqiullugu nunatsinni qaffasippallaarujussuarnerisa sumik tunngaveqarnersoq Per Rosing-Petersenip misissoqquaa, siunnersuullu ullumi pingajussaaneerneqassaaq.

Naalagaafiit Peqatigiit Nunarsuarmi piujuaannartitsineq tunngavigalugu ineriartortitsinissaq pillugu anguniagai Nunatsinni ineriartornermi Naalakkersuisullu sulinerannut qanoq ilanngunneqarnissaannik Inatsisartut oqallinnissaannik siunnersuut, Inuit Ataqatigiit Inatsisartuni ilaasortaatitaasa taava oqaluuserisassanngortippaat.

Kingullertullu ullumi sisamanngornermi oqaluuserineqartussaq tassaavoq Nunat Avannarliit Suleqatigiinnerat Pillugu Nassuiaat 2017. Taanna Namminiilivinnermut, Nunanut Allanut Nunalerinermullu Naalakkersuisumit saqqummiunneqassaaq.

Inatsisartut ataatsimiinnerat KNR-ikkut toqqaannartumik malinnaavigineqarsinnaavoq.