Inatsisartuni pingasunngornermi oqaluuserisassat

Ullumikkut Inatsisartuni oqaluuserisassat arfinillit oqaluuserineqassapput:

1) Tommy Marøp – Kulturimut, Ilinniartitaanermut, Ilisimatusarnermut Ilageeqarnermullu naalakkersuisup – tusagassiuisarnermi akisussaassuseqarneq pillugu Inatsisartut inatsisissaattut siunnersuut saqqummiutissavaa.

2) Siverth K. Heilmannip – Inuussutissarsiornermut, Suliffeqarnermut, Inuussutissarsiutinullu ilinniartitaanermut naalakkersuisup – atuisartunut pisisartunullu siunnersuisoqatigiit, tuniniaasarneq, nalunaaqutsersuisarneq, akit aamma atuisartunut pisisartunullu maalaaruteqartarfittut ataatsimiititaliaat pillugit Inatsisartut inatsisaata allanngortinnissaanut Inatsisartut inatsisissaattut siunnersuut saqqummiutissavaa.

3) Aleqa Hammondip – Ilaqutariinnermut Inatsisinillu Atortitsinermut naalakkersuisup – naartunermi, erninermi meeravissiartaarnermilu sulinngiffeqartarneq il.il. ullormusiaqartarnerlu pillugit Inatsisartut peqqussutaata allanngortinneqarnissaanik Inatsisartut peqqussutissaatut siunnersuut saqqummiutissavaa.

4) Aleqa Hammondip - Ilaqutariinnermut Inatsisinillu Atortitsinermut naalakkersuisup – inissiani attartortittakkani ineqarnermut akiliummut tapiissutit pillugit Inatsisartut peqqussutaata allanngortinnissaa pillugu Inatsisartut peqqussutissaatut siunnersuut saqqummiutissavaa.

5) Aleqa Hammondip - Ilaqutariinnermut Inatsisinillu Atortitsinermut naalakkersuisup – meeqqat peqataatillugit pornolianik il.il. inerteqqutaaneri pillugit nammineq aalajangikkamik isumaqatigiissummut tapiliussamut akuersinermut tunngatillugu Inatsisartut aalajangiiffigisassaatut siunnersuut saqqummiutissavaa.

6) Inatsisartunut ilaasortap Ane Hansenip IA-meersup siunnersuutigaa Naalakkersuisut peqquneqassasut aalisartitseqatigiiffiit aalisariutaatillillu ataasiakkaat tunisassiornermillu suliaqartut aalisarneq pillugu nunatsinni nunattalu avataanut tunisassiornermi pisunik iluanaarutinillu paasissutissanik pisortanut tunniussisussaatitaalissasut.