Inatsisartuni oqallinnerit sakkortuut

Siumumi siulittaasup Aleqa Hammondip inatsisartut ukiaanerani ataatsimiinnerat ima nalilerpaa:

- Siorna aningaasanut inatsisissatut siunersuut saqqummiunneqarmat pingaarutillit marlut oqaatigaavut, tassaasut kommuunerujussuit artorsarnissaat suliffissaaleqinerullu annertusinissaa. Tamarmik eqquupput.

- Maanna aappaagumut aningaasanut inatsisissatut siunersuut taama isikkoqarluni ingerlaqqilerpoq. Isumaqarpugut taanna naalakkersuisunut eqqarsartitsisimasussaagaluartoq. Ukioq mannamut aningaasanut nangiinnarnialerpaat, Aleqa Hammond oqarpoq.

Aningaasanut inatsisissatut siunersuut allannguiffiginiarlugu Siumut suliniuteqarsimasoq, Aleqa Hammond oqarpoq.

- Allannguutissatut siunersuutitigut taanna aamma angusaqarfigisimavarput. Sipaarniarnerit suli anginerugaluartut annernannginnerusumik inissinnissaannut uagut sulilluarnitsigut sunniuteqarfigaarput. Kisianni suli isumaqarpugut, aningaasalersorfissatut aallerfissaat innuttaasut peqataaffigissagaat, iisumaqaraluaratta nunani allaniit aningaasanik aallerfissat oqaasiinnaanngitsumik ingerlassimasussaagaluaraat, Aleqa Hammond oqarpoq.

Kuupik Kleist inatsisartut ataatsimiinneranni angusatnaammagisimaarpai.

- Annertunerpaartaatigut ukiaq manna pilersaarutigisimasagut naammassivagut, inatsisiliorneq eqqarsaatigalugu aammalu suleriaatsinik allanngortiterinissaq eqqarsaatigalugu. Taamaammat annertunerpaat naammassivagut kisianni tamakkiisuunngitsumik, Kuupik Kleist oqarpoq.

Siumut inatsisartuni sunniuteqarluarsimasoq Aleqa Hammond isumaqarpoq.

- Isumaqarpugut angisuumik sunniuteqartugut. Suli ajornerusimassagaluarpoq uagoqanngitsuuppat, Aleqa Hammond oqarpoq.