Inatsisartuni illuatungiliuttut avissaaqqapput

- Atassutip illuatungiliuttutut suleqatigigaluarunitigut ataatsimiititalianut amerlanerusunut ilaasortaatitaqarsinnaagaluarpugut, Siumup siulittaasua Aleqa Hammond oqarpoq.

Atassut sinnerlugu politikkikkut oqaaseqartartoq Finn Karlsen, ammaanermi oqallinnermut saqqummiussaqarnermini ilaatigut oqarpoq, Siumut Atassummut illuatungiliuttutut suleqateqarumalluni kimigiiseraluartoq.

- Atassummili nalilersuilluareerluta aalajangerpugut uagut nammineq arlaannaanulluunniit pituttornerarata sapinngisamik annerpaamik sunniuteqarnissarput siunnerfigalugu suliniarluta, tamannalu naammagisimaakkatsinnik kinguneqarluarpoq, Finn Karlsen oqaluttarfimmit oqarpoq.

Atassut sinnerlugu inatsisartunut ilaasortat pingasut ataatsimiititaalianut pingaaruteqartunut ilaasortaapput, soorlu aningaasaqarnermut ataatsimiititaliamut kiisalu inuussutissarsiutit pillugit ataatsimiititaliamut. Atassut sinnerlugu politikkikkut oqaaseqartartup, Finn Karlsenip, ataatsimiititalianut ilaasortaatitaqarnikkut sunniisinnaanermut qulakkeerinnittutut naammagisimaarinnilluni oqarnera, Siumup siulittaasuata Aleqa Hammondip qisuariaallaatigaa. Illuatungiliuttut suleqatigiinnermikkut ataatsimiititaliani amerlanerusuni ilaasortaatitaqarsinnaagaluarnertik erseqqissaatigalugu.

- Atassutikkormiut illuatungiliuttuunerminni inissisimaffissartik pitsaanerpaaq, nakuunerpaaq sunniuteqarfissaanerpaarlu paasisimanngilaat. D'Hondip ileqqua naapertorlugu, tassa ataatsimiititalianut inuttalersueriaaseq naapertorlugu, Atassut illuatungiliuttunik suleqataasuugaluarpat, ataatsimiititaliani inissani tallimaasuni marluk illuatungiliuttunut tunniunneqarsinnaanngussagaluarmata. Ataatsimiititalianilu tamani issiatitaasinnaanissartik ilisimasimanngilaat, Aleqa Hammond oqarpoq.

Siumup illuatungiliuttutut suleqateqanngikkaluarluni ataatsimiititaliani ikinnerussuteqartutut oqaaseqarsinnaatitaanissani qulakkeerumavaa.