Inatsisartuni ilaasortaq kamaannermi peqataasoq

ILUARSISAQ: Atassut sinnerlugu inatsisartunut aamma kommunalbestyrelsimut ilaasortaq, Thomas Kristensen, Inatsisartunit tunuarnissaminik eqqarsaateqalerpoq, sapaatip akunnerata naanerata matuma siuliani Tasiilami kamaannermut peqataasimanera avammut saqqummiunneqareersorlu. Atuagagdliutit ullumi saqqummersut taama allaaserisaqarput. Tunuarnissamillu eqqarsaateqarnini pisimasumut attuumassuteqannginnerarpaa.
Allattoq Louise M. Kleemann
septembarip 09-at 2008 06:52

Kinaassutsiminnik oqaatiginnikkumanngitsunit allakkami 50-it angullugit atsiorneqarsimasumi oqaatigineqarpoq, Thomas Kristensen arfininngornerup aggustip 31-ata unnuaani kamaannerni arlalinni peqataasimasoq, ilaatigut tilluisimalluni toqqusassiisimallunilu.

Pisimasoq Thomas Kristensenip Atuagagdliutinut uppernarsarpaa, kamaannermulli tunngatillugu allamik nassuiaateqarluni.

- Angut inuusuttoq ilisarisimasara kakkanniarpoq, piffissallu ilaani nipangeqquara. Taamatut oqaaseqarnera pissutigalugu angutip inuusuttup malersulerpaanga patittalerlungalu, silamullu anillakkatta kamaattoqalerpoq. Nuliaralu taxamut ikeriarluta angerlapallappugut, sivitsunngitsorli angut inuusuttoq ikinngutaalu illutsinnut takkupput, imminullu illersorniarlunga inuusuttut ilaat tilluppara, Thomas Kristensen oqaluttuarpoq.

Tamatuma kingorna pisimasoq politiinut nalunaarutigineqarpoq. Thomas Kristensenillu politikeritut ingerlaqqinnissaminik eqqarsaateqarnini pisimasumut attuumassuteqannginnerarpaa, suliffiutiminillu ulapputeqarnini tunngavilersuutigalugu.

- Inuit sinngapput. Iliuuseqartungalu sorsuakkiarineqartarput, maannakkullu atugarliortorujussuuvunga, Inatsisartunut ilaasortaq Atuagagdliutini taama issuarneqarpoq.

Thomas Kristensen nalunaarutiginnittuunersoq imaluunnii nalunaarutigineqarnersoq pillugu Tasiilami politiit oqaaseqarumanngillat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq