Inatsisartuni ataatsimiititáliat ikinnerusut amerlanernik ilaasortallit

Ataatsimiititaliat assingusunik suliaqartut kattunneqarsinnaanerat inatsisartut siulittaasoqarfiani oqaluuserineqartut ilagaat, Inatsisartut siulittaasuat Josef Motzfeldt oqarpoq. Ilaqutariinnermut ataatsimiititaliaq peqqissutsimut ataatsimititaliarlu kattunneqarsinnaapput, aammalu akileraartarnermut aningaasaqarnermullu ataatismiititaliat kattunneqarsinnaapput, Inatsisartut siulittaasuat Josef Motzfeldt oqarpoq.

Inatsisit atuuttut malillugit ataatsimiititaliat ataavartut tassaapput Aningaasaqarnermut ataatsimiititaliaq aammalu Inatsisartut naatsersuutai pillugit kukkunersuinermut ataatsimiititaliaq aammalu nunanut allanut sillimaniarnermullu ataatsimiititaliaq kiisalu inatsisit pillugit ataatsimiititaliaq. Ataatsimiititaliat sinneri inatsisartut siulittaasoqarfiannit ivertinneqartarput, taakkua ilinniagartuutut ilinniarsimasumik allatseqarput, ataatsimiissutissanik piareersaasarlutik apeqqutinik akissuteqartarluitk aammalu ataatsiminnerit naalisarnerat suliarisarlugit.