Immiussat aserorterpaat

Amerikamiut isertortumik paasiniaasartoqarfianni, CIA-mi, 2002-miilli videobåndit ikinnerpaamik marluk, ajortumeeriniatut pasineqartut killisiorneqarnerannit immiussat aserorterneqarsimapput. CIA-miit nalunaarutigineqarpoq kilitsissiat videoni ilaasut ajoquserniarnagit taamaaliorsimallutik, aviisimiilli New York Timesimiit killisiueriaatsit peqqarniippallaaqimmata videot aserorterneqaarsimanissaat ilimagineqarpoq.

Videobåndit aserorterneqarsimasut sammineqalerput septembarip aqqarngani 2001-imi ajortumeeriniaqataasut ilaata eqqartuussivimmi illersortaata illersukkami killisiorneqarneranit immiussat eqqartuussivimmi takutinneqarnissaat piumasarimmagu CIA-miillu akineqarmat videot peqanngitsut.

Tamatuma kingorna CIA-miit nassuerutigineqarpoq, namminneq videoni paasissutissat iluaqutigisinnaajunnaaramikkit killisiuisut ajoquserniarnagit videot 2005-imi aserorterneqarsimasut.

Aviisili New York Times allappoq, killisiueriaatsit peqqarniippallaaqimmata videot aserorterneqarsimasut, pisortallu killisiueriaatsit atorneqarsimasut inatsisinik unioqqutitsinerunissaat aarlerigimmassuk, aviisi allappoq. Aviisimiit aamma soqutiginartinneqarpoq Amerikamiut isertortunik tigusarinnittarsimasutut, isertortunik nunani assigiinngitsuni paarnaarussiveqarsimasutut, isertortumillu killisiuisarsimasutut paasineqarnerata nalaanni, 2005-imi videot aserorterneqarsimanerat. CIA-miit al-Qaedameersunik killisiuinerit siulliit sakkortusimanerat nassuerutigineqarpoq, killisiueriaatsilli atorneqartut inatsisinik unioqqutitsinerusimanngitsut.

Amerikamili inatsisartuni inatsisit pillugit ataatsimiititaliap siulittaasua, Patrick Leahy oqarpoq, videot aserorterneqarsimanerat ajornartorsiutinik pilersitsisoq, apeqqutinillu amerlisitsiinnarluni. Ataatsimiititaliamilu ilaasortat arlallit pisimasup iternga tikillugu qulaajarneqarnissaa piumasaraat.