Immiugassamik nunarput karreqarsimagaluarpoq

Nassaap ukiut 1.000-it sinnerlugit pisoqaassusillip uppernarsarpaa qallunaatsiaat Erik aappalaartup nalaani nunatsinni karrinik suaasiassanik naatitsisarsimasut.

Qallunaat itsarnisarsiuut kujataani 2010-mi 2011-milu assaallutik misissuipput. Maanna misissueqqissaarnerit takutippaat karrinik suaasiassanik taamanikkut naatitsisoqartarsimasoq. Tamanna qangali pasitsaanneqartarsimasoq aatsaat uppernarsaatissarsineqarpoq.

- Itsarnisarsiuut qangali ilimatsaassimavaat qallunaatsiaat nunaseqqaartut illumi ungasinngisaani kujataani nuna naggorissoq naatitsiffigisarsimagaat. Tamannali aatsaat tasssa misissorneqarlunilu uppernarsaatissarsineqarpoq, nunalerisutut kujataani assaanerni suleqataasoq Peter Steen Henriksen Videnskab.dk-mut oqarpoq. Taanna naalagaaffiup katersugaavissuata misissuinerani siuttuuvoq.

Qallunaatsiaat attakuini nassaarineqarsimapput karrit kanaartaat mikisoralannguit, taakkulu misissoqqissaarneqarsimapput. Paasinarsivoq taakku tassaasut karrit kanaartaat taamaasillunilu uppernarsineqarpoq kujataani karrinik naatitsisoqartarsimasoq.

- Kanaartanik nassaarnitsigut paasinarsivoq qallunaatsiaat nunasisut siulliit namminneerlutik karrinik naatitsisarsimasut, Peter Steen Henriksen oqarpoq.

Silaannarli pueqqortinnerummat nunatsinni karrinik naatitsiniarneq ajornarsivoq. Tamatuma kinguneranik qallunaatsiaat uumaannarsinnaanerat ajornakusoortorujussuanngorpoq inuuniarnerannut karrit pingaaruteqarluinnarmata.

Qallunaatsiaat pillugit allassimasunik uppersaatit kingullersaat tassaavoq Hvalsøep oqaluffiani 1408-mi katittorsiornermit oqaluttuaq. Qanga qanorlu qallunaatsiaat nunatsinniit tammarsimanersut qulakkiivillugu uppernarsineqarnikuunngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat