Imminut toquttartut immaqa ikiliartorput
Naatsorsuutilli avaanngunartut suli allannguissorsimanngeratarsinnaammata peqqinnissamik isumaginnittut mianersuutigeqquaat.
- Neriuppugut ikiliartuinnarumaartut. Pissutsilli ukiuni tulliuttuni malinnaaffigigallassavavut, suliniummik ataqatigiissaarisoq Jette Eistrup Paarisameersoq Sermitsiamut oqarpoq.
Allanngorneq taama annikitsitigitillugu kisitsisit taassuma mianersuuttariaqarsorai.
Peqqinnissamik nakkutilliisoq Flemming Kleist Stenz aamma utaqqimaarallarpoq.
- Uangattaaq neriuttorujussuuvunga, ukiunili tulliuttuni qanoq pisoqarnissaa takoqqaarallartariaqarparput, Flemming Kleist Stenz oqarpoq.
Imminut toquttarneq pitsaaliorniarlugu suliniutit Nunatsinni misilittagarineqartut, Nuummi sapaatip akunnerata naanerani isumasioqatigiittoqalerpat oqaluuserineqassapput.
