Imminut toquttarneq pinaveersaartinniarlugu pikkorissarput
Kommune-mi pinaveersaartitsinermik suliaqartut neriupput inuusuttut meeqqallu imminnut toqukkusuttut sukkanerusumik nassaarineqartalissasut. Imminortarnerup pinaveersaartinneqarnerata suliffeqarfinnut assigiinngitsunut siammartinneqarnissaa Kommuneqarfik Sermersuumi pisariaqartinneqarpoq, kommunip immikkoortortaqarfiini sulisut allat qanoq pinaveersaartitsisinnaanerat pisariaqartinneqarluni, pikkorssarnermilu tamakku oqaluuserineqarput Marie Lyberth Kommuneqarfik Sermersuumi pinaveersaartitsinermik siunnersorti oqarpoq.
Inuusuttut ornittagaanni ungdomsklubbe-ni sulisut inuusuttut maluginiarsinnaavaat suut nalunaarutit imminornissamut malunniutit inuusuttut akornanni suliniutigineqarsinnaanersut, Marie Lyberth oqarpoq.
Pikkorissarnermi Danmarkimeersut immikkut ilisimasallit misilittagaqarluartullu saqqummiussipput taakkualu tunngavigalugit peqataasut oqallittarlutik.
Pikkorissaqataasut ilaat, inunnik isumaginnernermi siunnersortitut ikiorti Emilie Olsen, pikkorissarnermit angusaqarluarsimavoq. Isumaqarporlu imminortartut ikilisinniaraanni immikkoortortaqarfiit akimorlugit suleqatigiinnissaq pisariaqartoq, pinaveersaartitsinermik suliaqartut kisimik pinnatik siammasissumik suliffeqarfiit sorliugaluarpataluunniit eqqartorneqartarnissaa Emilie Olsen-ip pingaaruteqartutut isigaa.
Kommuneqarfik Sermersuumi isumaginninnermut siunnersortimut ikiorti Emilie Olsen kingulliulluni taamatut oqarpoq. Pikkorissartitsinermi Qeqertarsuatsiaaniit Paamiuniillu peqataasoqarpoq.
