Imminut toquttarneq akiorniarlugu ullorititaq malunnartinneqarpoq
Ullumi ulloq tassaavoq imminut toquttarneq akiorniarlugu nunarsuaq tamakkerlugu ullorititaq. Tamannalu Nunatsinnit aamma malunnartinneqarpoq.
Imminut toquttarneq akiorniarlugu paasititsiniaasut ilagaat suliniummik "Inuuneruna Iggoraarsuk"-mmik pilersitsisoq, Paninnguaq Heilmann.
Taanna Nuuk Centerimi tuluujuaqqanik akiginiaavoq, aningaasallu nittartakkamut inuunermik annaassisinnaasumik atorneqassapput.
- Isumaqaratta ajornartorsiut nalunaaqutalerneqarsinnaanngitsoq. Periarfissaareersut, soorlu assersuutigalugu oqarasuaatikkut saaffiginnittarfiit ullormut nalunaaquttap akunneri marlunnik ammasartut, naammaginnginnatsigit, aamma maluginiarnikuugatsigit inuusuttut nittartakkamik atuisorujussuusut, Paninnguaq Heilmann oqarpoq.
Kinaluunniit nittartakkatigut ulloq unnuarlu saaffiginnissinnaalissasut, namminnerlu kajumissutsiminnik sulisut pikkorissarsimasullu saaffiginnissutit akisassagaat Paninnguaq Heilmann oqarpoq.
Qitiusumik Siunnersuisarfik Nuuk Centerimi aamma paasisitsiniaaqataavoq.
- Kinguaassiutitigut atornerlugaasimanerup kingunerisartagaasa ilagaat imminut toqukkusulertarneq, tamannalu pillugu maani peqataavugut, Qitiusumik Siunnersuisarfimmi aqutsisoq Arnajaraq Poulsen taama oqarpoq.
Ullorititaq Qeqqata Kommunianit aamma malunnartinneqarpoq, Sisimiunilu innuttaasunut tamanut Minngortuunnguup Atuarfiani oqallitsitsisoqassalluni, unnuk-manna nalunaaqutaq arfineq-marluniit.
