Imminut toquttarneq akiorniarlugu suliniuteqalersut
Canadami imminut toquttarneq ajornartorsiutaaqisoq akiorniarlugu, sapaatip akunnerani uani nuna tamakkerlugu iliusissamik suliniutissamik, Canadami naalakkersuisut suliniuteqarniarlutik aalajangeqqammerput.
Inuit Tapiriit Kanatamit oqaaseqartartuusup oqaatigaa, taamatut aalajangerneq assut nuannaarutissaasoq. Tassami Canadami issittup killeqarfiani imminut toquttarneq ajornartorsiutaalluinnarmat, allaallumi Canadap nunap immikkoortortaqarfiinut allanut naleqqiulugu, imminut toquttarneq tamaani aqqanileriaammik qaffasinneruvoq, inuusuttunillu ingammik atugaanerulluni.
- Pingaaruteqarpoq suliniutip aaqqissuulluakkamik suliarinissaa, inuusuttunullu neriuteqalersitsissappat piaartumik suliniut aallartisarneqartariaqarpoq. Nuna tamakkerlugu pilersaarusiorneq suliniutigineqartariaqarpoq, nuannaarutigeqaarpullu suliaq ingerlaqqissinnaalermat, Inuit tapirit Kanataami oqaaseqartartoq oqarpoq.
Naatsorsuutigineqarpoq pilersaarusiaq ikiuigasuartarfinnik arlalinnik pilersitsiviussasoq, sulisunillu immikkut sungiusarluarsimasunik amerlanerusunik, inuusuttunut ajornartorsiuteqartunut neqeroorsinnaajumaarlutik.
