Imminut toqunneq pillugu piviusulersaarusiap qanigisaasut ikiussavai

Klaus Geislerip piviusulersaarummi nutaami Imminut toquttarneq - Ingerlaqqinnermi taaguutilimmi misigisimasani oqaluttuarai. Piviusulersaarusiami imminut toqunnermik annaasaqarsimasut ingerlariaqqinnissaminnut iluaqutigiumaaraat ingerlatsisup Ane Lena Fussing Rosbachip neriuutigaa.

Allattoq Jonna Enoksen Dahl

septembarip 16-at 2026 15:51

Piviusulersaarut Imminut toquttarneq - ingerlaqqinnermik ateqarpoq. Taanna imminut toquttoqarsimatillugu qanigisaasut qanoq ingerlaqqissimanerannut tunngasuuvoq.

Sunaana pissutaasoq imminut toquttartut taama amerlatiginerannut? Nunani allani allaanerua? Ajornartorsiut suli annertusiartorpoq, kisianni qanoq iliuuseqartoqarpa? Oqartussaasut imminut toqunnissamik pinaveersaartitsiniarlutik qanoq suliniuteqarpat?

Piviusulersaarummi, suli immiunneqartumi, apeqqutit ilaatigut tamakkua akissutissarsiniarneqassapput.

Apeqqutit akissutisiniarlugit politiit, kommuni aamma Naalakkersuisut oqaloqatiginiarneqassapput.

Sakkortusoq

Klaus Geisler piviusulersaarummik isumassarsisuuvoq.

Klaus Geislerip nammineerluni ataatani, anaanani, qatanngutini erninilu imminut toqunnermut annaanikuuai.

- Assut sakkortuvoq. Sanaleratsigu eqqarsaaterpassuit, suna imarissavaa? Aamma uannut qanittuararsuugami, erninnguara siorna annaagatsigu, Klaus Geisler oqarpoq nangillunilu:

-Soorunalimi uanga oqaluttuara saqqummiuppara. Ilaqutariit allat piviusulersaarut takugunikku tarrarsorsinnaassasut neriuppunga, ingerlariaqqinnissamullu qanoq iliorsinnaanerminnik isumassarsillutik.

Piviusulersaarummi Klaus Geislerip imminut toqunnermut tunngatillugu misigisimasani, inuiaqatigiinni imminut toquttarneq ammasumik oqaloqatigiissutigineqarnerulertariaqarnera aamma qanoq pinaveersaartitsisoqarsinnaanera ilaatigut oqaluuserissavai.

- Una pingaaruteqarpoq, aamma inuiaqatigiinni amerlasoorujussuupput imminut toqukkut annaasaqarnikut. Taamaammat kisimiinngillat aamma uagut kisimiinngilagut. Taamaattumik imminut toqunneq pinaveersaartillugu una sanarusupparput.

Klaus Geislerillu imminut toqunnissamik eqqarsaateqartut ikiornissai neriuutigaa.

- Annaarusunngilagut, taakku imminut toqunnissamik eqqarsaateqartut. Naleqarput aamma ikiorusuppagut.

Piviusulersaarut ukioq ataaseq sinnilaarlugu suliarineqareerpoq, filmiliornerillu massakkut ingerlalereersut Klaus Geisler oqarpoq.

- Massakkut Ilulissani, Nuummi Arsummilu suliassat naammassereerpagut. Danmarkimi suliassagut tullinnguuppagut.

Imminut toqunnissamik eqqarsaateqarninni ikiorneqarnissannik pisariaqartitsivit?

Kiserliorpit aamma oqaloqateqarnissannik pisariaqartitsivit?

Kisimiinngilatit. Piffissani inuunermi pisumiluunniit artornartorsiorfimmi, nammineq sapikkaminnik pisoqaraangat, inuit amerlanerpaat tusaaneqarnissartik pisariaqartittarpaat.

Tusarnaarnissamut piffissaqarpugut. Tusaanngap siunnersortai tusarnaartarput, ilungersuutivillu oqaasertalernissaanut ikiorsinnaallutit. Aamma illit inuuninni pissutsit artornartut qanoq iliuuseqarfiginissaanut sakkussannik tunisinnaavaatsit.

Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akornassinni inuttut oqaloqatigiinneq, tassani oqaloqatigiinnerup imaa illit aalajangissavat.

Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussisinnaaffiuutigaluni akeqanngilaq – aamma Tusassit imaqanngikkaluarpalluunniit sianersinnaavutit allallutilluunniit.

Telefon: 80 11 80

SMS: 1899

Tusarfik: Tusaannga

Nunani allani suleqatissarsiortut

Ane Lena Fussing Rosbach piviusulersaarummi ingerlatsisuuvoq.

Taanna ernini Marc Fussing Rosbach aamma Liam Fussing Rosbach peqatigalugit piviusulersaarusiornermik siornali suleqataalerpoq.

- Uagut takutikkusupparput, inuuneq ingerlaqqittartoq aamma ikiortissaqartugut. Ikiortissat taakkua atorluarusukkatsigit oqaloqatissat, saaffiginniffissat. Aamma ingerlaqqittoqarsinnaasoq taartumiiginnarnarni taavalu aamma inuuneq qaammariartulissasoq, Ane Lena Fussing Rosbach oqarpoq.

Imminut toquttarneq pillugu Nunatsinni Nakorsaaneqarfiup ukiumoortumik nalunaarusiaa 2025

-2025-mi imminut toquttut, 2018-imiit 2025-mut amerlanerpaallutik, 50-iupput.

-Nunatsinni imminut toquttartut Danskit nunarsuullu imminut toquttarnernut sanilliullugu arfineq marloriaataannik qulingiluariaataannillu amerlanerupput.

-Imminut toquttut 84 procentii angutaapput.

-15-it 24-llu akornanni ukiullit amerlanersaapput.

-Imminut toquttut 30 procentii tarnikkut nappaateqarput, 24 procentiilu siornatigut imminut toqoriarsimapput.

-Arlaannaalluunniit ullualunnik sioqqutsillutik imminut toqunnissaq eqqarsaatigalugu Peqqinnissaqarfimmut attaveqarsimanngillat.

-Paasissutissani pigineqartuni tamani imigassartortoqarsimavoq.

Piviusulersaarummi Nunavummi, Nunavimmi Saamit Nunaannilu imminut toqunnermut kisitsisaat nunatsinni kisitsisinut sanilliunniarlugit ingerlatsisup nassuiaatigaa.

- Issittuni nunap inoqqaavisa statistikkii aamma ilanngukkusuppagut, pissutigalugu assigiittorujorujussuugamik. Amerlanertigut angutit inuusuttuaqqat inuusuttut imminut toquttarnerat annertoorujussuugami. Assigiipajaartorujussuugamik.

Aamma Australiamiit New Zealandimiillu suleqatissarsiorlutik Ane Lena Fussing Rosbach oqarpoq.

Piviusulersaarutip saqqummerfissaa suli ullulerneqanngilaq, Ane Lena Fussing Rosbachilli ukiup ataatsip ingerlanerani naammassinissaa neriuutigalugu oqaatigaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.