Imminut toqukkusullutik eqqarsaateqartut ikiortissarsiornerat ajornakusoortoq
![Paninnguaq Heilmann](/sites/default/files/styles/image_934x467/public/article_images/dscn0603.jpg?itok=QjX1DIaj)
Imminut toqunnissamik eqqarsaateqatut ikiortissarsioraangamik allaffissornerup iluanut pulatinneqarneq misigisarpaat.
Tamanna qanoq artornartigisinnaanera Paninnguaq Heilmannip, Suliniummi Inuuneruna iggoraarsummi aallartitsisup, nammineerluni misiginikuuaa.
- 19-inik ukioqarlunga imigassartornikuullunga aappassaa imminut toqoriaraluarama aaliangerpunga ikiortissarsiorniarlunga. Siullermik Sanami oqaloqatiginnippunga, tassani Qaqiffimmut innersuuppaannga Qaqifiimmukarpungalu aperiartorlunga qanoq ilioruma ikiorneqassanerlunga, Paninnguaq Heilmann KNR-imut nassuiaavoq.
Tamatuma kingorna Paninnguaq Heilmann kommunimut saaffiginneqquneqarpoq. Tassanilu inunnik isumaginninnermik sullissisumik oqaloqateqarnissamik piffissamik tunineqarluni, oqaloqatiginninnissamullu utaqqisimalluni. Isumginninnermik sulialimmik oqaloqateqareerluni sapaatit akunnerit arlallik akissutisinissaminut utaqqisariaqarsimavoq. Qaammallu ataaseq qaangiummat aatsaat Sanamukaqqissinnaasimavoq, tassanilu tarnip nappaataanut nakorsamik oqaloqateqarsinnaalersimalluni.
Ajornartorsiut takornartaanngitsoq
Paninnguaq Heilmann piffimmiit piffimmut miloriunneqaqattaartutut misigisimavoq, naak apeqqut akissutisiniagaa ajornanngitsunnguugaluartoq.
- Ikiorneqarsinnaanerpunga. Pisariaqartitsininnut tunngavikka naammannerpat. Ikiorneqarniaraanni saaffiginniffissat ersarissarneqartariaqarput, Paninnguaq Heilmann oqaluttuarpoq.
Paninnguaq Hailmannip aqqusaarsimasaa immiikkuullarissuunngilaq. Ikiortissarsiornerup unamminartuuneranik misilittagallik arlallik Radioaviisip naammattoorpai.
Tamakkulu Paninnguaq Heilmannip, Inuuneruna iggoraarsuk aqqutigalugu, aamma tusartatrpai.
Akisussaaffik sumiinnersoq nalornissutigineqartoq
Taamatuttaaq kikkut suna suliassarineraat nalornissutigineqartartoq politiit aamma nalaattarpaat.
- Politiini maluginiartarparput soorlu napparsimaveqarfimmi sulisut isumaqartartut imminut toquttarnermut pinaveersaartitsinermik suliaqarneq politiit akisussaaffigigaat. Kisianni napparsimaveqarfimmut inatsimmi takusinnaavarput pinaveersaartitsinermut akisussaaffik napparsimaveqarfimmiittoq, Viggo Johansen, vicepolitiinspektøri, KNR-imut oqaluttuarpoq.
Taassuma pinaveersaartitsinissaq politiit suliassarinngikkaat naqissuserpaa, taamaattorli ersarissunik najoqqutassaqarnissaq pingaartuunera erseqqissarlugu.
- Inuit paatsiveeruttartut sumut saaffiginnissanerlutik. Politiinut saaffiginnittoqartarpoq saaffiginnittoqaraangallu napparsimaveqarfimmut inunnillu isumaginnittoqarfimmut innersuuttarpagut. Uanili pinaveersaartitsinermut tunngasumi isumaqarpunga pisortat assigiinngitsut katersuunnissaat oqaloqatigiinnissaallu pisariaqartoq, pinaveersaartitsinermut tunngasut suut aallartinneqarssanersut, kiisalu kiallu suut qanorlu suliarineqassanersut isumaqatigiissutigineqartariaqarmata.
Video takuuk: Politiit peqqinnissaqarfik isumaginnittoqarfillu imminut toquttarneq pillugu suleqatiserigaat
Paninnguaq Heilmannip ikiortissarsiorneq ilungersunartutut misigisimavaa.
Taassuma imminut toqunnissamik eqqarsaateqarnermi ikiortissarsiorneq nukippassuarnik atuiffiusartoq oqaatigaa.
- Taamatut nakkaqqalluni ikiortissarsiorneq nukippassuarnik atuiffiusarpoq. Taamaammallu ikiorneqarniarluni piffiit assigiinngitsut orneqataassallugit ajornakusoortupilussuusinnaavoq. Uanga nammineq ilungersunartutut isigaara, Paninnguaq Heilmann oqarpoq.
Nikallungaguit Paarisap nuna tamakkerlugu oqarasuaatikkut siunnersuiffianut Attavimmut sianersinnaavutit, normoraa 146. Imaluunniit meeqqaat oqarasuaataannut 134-imut sianerlutit oqaloqateqarsinnaavutit.