Imminut toqoriartarneq pillugu allakkiaq saqqummerpoq

Misissuinermi inuusuttut 508-t, 15-iniit 17-inut ukiullit, peqataatinneqarput, nukappiaqqat 231-t niviarsiaqqallu 277-it.

Inuusuttut misissuinermi peqataatinneqartut pingajorarterutaasa imminut toqunnissartik ilumoorullugu eqqarsaatigisimavaat. Misissuinermi takutinneqarpoq, niviarsiaqqat eqqarsaatigalugit, kiserliorneq taavalu misigisat kingunerlutsitat imminut toqukkusulernermik kinguneqartitsisartut. Nukappiaqat imminut toqoriaraluarsimasut ikittuinnarnik qanittumik ikinnguteqarput, ikinngutiminnillu atuareernerup kingorna qaqutiguunerusoq ilaqartarlutik.

Misissuinerup aamma takutippaa nukappiaqqat niviarsiaqqallu imminut toqunnissamik eqqarsartarnerat sumiiffimmiit sumiiffimmut assigiinngissuseqartoq. Soorlu Tunumi inuusuttut 100-juuppata taakku affaanit amerlanerusut imminut toqunnissamik eqqarsaateqarsimapput, Nuummi inuusuttut 15 procentii taavalu nunatta Kitaata kujataani inuusuttut 20 procentii imminut toqunnissamik eqqarsaateqartarsimallutik.

Nukappiaqqat eqqarsaatigalugit kissaatiginngisamik kisimiittarneq aamma peeqqamik aappaqarunnaarneq imminornissamik eqqarsalersitsisartuuvoq.

Niviarsiaqaat imminut toqoriartarnerannut kinguaassiutitigut atornerlunneqarsimaneq, aamma kissaatiginngisamik kisimiittarneq pissutaasartut annersaraat.

Inuusuttut isumaat naapertorlugu imminut toqukkusulersarneq qanoq annikillisarneqarsinnaava?

Inuusuttut ujartorpaat inersimasunit isumassorneqarnerunissaq, sianigineqarnerunissaq tusaaniarneqarnerunissarlu, aamma oqaloqatigiillaqqinnerunissaq imminullu tusarnaarnerunissaq nalinginnaasumik pisariaqartuusoq tikkuarlugu.