Imminut killilersuiffigineq aqqutissaanngilaq
Danmarkimi eqqumiitsuliortut peqatigiiffii arlaqartut danskit kulturimut ministeriat Carina Christensen ullumi ataatsimeereerlutik taamatut isumaqatigiipput.
Eqqumiitsuliortut eqqumiitsuliatik suliaralugit aallartitsinnagit eqqarsarluaqqissaartarput, saassunneqarnissamik kinguneqarsinnaammata, aviisip A-4-ip misissuisitsineranit tamanna paasineqarpoq. Misissuisitsineq pivoq titartaasartup Kurt Westergaardip saassunneqarnerata kingorna.
Misissuisitsineq oqallisaavoq, eqqumiitsuliortullu isumaqanngillat, suliatik killilersussallugit musliimit ingasattajaarniat qunugalugit, tamakku ilagaat erinarsortartoq Pia Raug.
Ileqqorissaarneq uani pineqarpoq, eqqumiitsuliortut ileqqorissaartut ileqqorissaarlutik pissusilersortarput, suliatik killilersorneq ajorpaat. Eqqumiitsuliortut qanorluunniit oqaaseqarsinnaatitaanertik saqqummiussaqarsinnnaanertillu suliassaraat. Naalagaaffik ileqqorissaarnermik pissusilersunngippat, eqqumiitsuliortut suliassaraat tamanna akiussallugu, Pia Raug oqarpoq. Danmarkimi kultureqarnermut ministeri Carina Christensen eqqumiitsuliortut suliaminnik killilersuinerannik oqallinneq aallaavigalugu annertuumik qanoq iliuuseqarniarnani oqarpoq. Taamaattorli ajornartorsiutip iternga tikillugu paasineqarnissaa eqqumiitsuliortut kissaatigippassuk ikiuukkusulluni oqarpoq. Eqqumiitsuliortut namminneerlutik misissuisitsinissamik pisariqartitsillutik uannut nalunaarutigaat, suliffigisinnaasaannillu nassaarsinnaaguma ikiorsinnaavakka immaqalu aningaasanik ikittunik tapiiffigalugit, suliassaq aallartinniassammassuk Carina Christensen oqarpoq.
