Imminut ilisimasaqarnerartut akuliuttuarnerat qatsuppaa

Aatsiatassarsiorniarneq pillugu sumulluunniit atanngitsumik siunnersuisoqalernissaanik Inuit Issittormiut Siunnersuisoqatigiiffiata siunnersuutaa, Sulinermik Inuussutissarsiuteqartut Kattuffiani siulittaasup Jess G. Berthelsenip sakkortuumik akerlilerpaa.
marsip 18-at 2011 09:37

Sumulluunniit atanatik namminneerlutik siunnersuisunngortittut, imminnullu neqeroorutigalutik suliamut aalajangiisussanut, allanullu kalluarneqartussanut, piuminaatsooreeqisumut, qanoq isumaqarnerminnik saqqummiussisussat amerlanerit atorfissaqartinneqanngitsut, Jess G. Berthelsenip tusagassiuutinut nalunaarummi erseqqissarpaa.

- Nunarput namminersuleqqammersoq, politikkikkut demokraatiskiusumik aqutseriaaseqalereersimavoq. Politikkikkullu aalajangiinissamik akisussaaffik qinikkatta tigusariaqarpaat, piviusunngortinnissaanummi taakku qinigaapput. "Namminneerlutik immikkut ilisimasaqarnerartut" akuliuttuarnerat SIK-p qatsulluinnarpaa.

- Taakku qanittukkut immaqa oqartalissapput nammineq nunagisatsinni queqqusaajunnaartugulluunniit, Jess G. Berthelsen oqarpoq.

Isumannaallisaaneq avatangiisillu illersorniarlugit pisariaqartunik soorunami iliuuseqassallutik aamma oqarpoq.

- Kisianni pingaarutilerujussuuvoq nunami maani, aningaasarsiornikkut tatineqarsimaqisumi, suliffissanik piaarnerpaamik pilersitsinissaq, SIK-p siulittaasua oqarpoq.

Inuit Issittormiut Siunnersuisoqatigiiffiannit Naalakkersuisunillu aallartitat nunami maani pisut oqaluuseriartorlugit Canadaliartariaqarsimanerat Jess G. Berthelsenip eqqumiigaa, maanimi taamaaliorsinnaammata.

- Taannaannanngilarli, kattuffik SIK, sulisartut soqutigisaannik sullissisuusoq, peqataarusunnersoq ICC-p aperisimanngilaaluunniit, Jess G. Berthelsen aamma oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk