Imminut akilersinnaasumik angallassinissaq pisariaqarpoq

Air Greenland-ip pisortaanera Christian Keldsen, Narsarsuarmi Takornarialerisup Jacky Simoud-ip isornartorsiutaanut akissuteqarluni allappoq, imaalluarsinnaasoq ukiuni aggersuni, septemberip qaammataani Danmarkimiit Narsarsuarmut timmisartuussisalerumaarlutik.

Jacky Simoud ippassaq ullup qeqqanut radioaviisikkut oqarpoq, septemberimi Danmarkimiit Spaniamiillu Kujataanut takornariarumasorpassuusut, uggoralugu Air Greenland sapaatip akunneranut ataasiaannarluni timmisartuussisassammat, naak aasaaanerani pingasoriartaraluartoq. Aamma uggoraa, Air Greenland-ip politikkerit siuarsaaqqusillutik inassutaat malikkumanngimmagu.

-Tamanna eqqunngilaq tunngavissaqarnanilu. Takornarianut sumiiffinnilu najugaqartunut akilersinnaasumik iluaqutaasumik angallaassinissarput suliassaraarput, aamma assartuinikkut, poortukkanik allakkanillu angallassinikkut tamanut iluaqutaasumik. Illersorsinnaanngilarpullu timmisartut imaqanngingajattut angalatissallugit, taama allappoq Christian Keldsen.

Maj-mi, juni-mi juli-milu Narsarsuarmut timmisartoq ulikkaartarsimanngitsoq aamma allappoq.