Imminortarneq pinaveersaartinniarlugu suliniuteqartussanik atorfillit
Namminersornerullutik Oqartussat inunnik pingasunik nunatsinni imminortarneq pinaveersaartinniarlugu suliniuteqartartussanik atorfinititsisimapput. Imminortarneq pinaveersaartinniarlugu suliniutinik ataqatigiissaarisoq Jette Eistrup oqarpoq, ukiuni pingasuni tulliuttuni suliniutit assigiinngitsut aallarnisarneqassasut innuttaasullu sinerissamiittut suliniutinik tigusilluartut.
-Kikkut tamarmik imminortarneq pillugu eqqartuinissaminnik periarfissinneqaramik nuannaarput namminerlu illoqarfigisaminni suliniutigeriikkamik tapersersorneqarnertik iluarisimaarlugu. Imaanngilaq tikikkutta suliniutit aatsaat aallartittarigut. Illoqarfinni tamangajanni inuuneq nuannernerusumik imaqartinniarlugu suliniutit arlallit ingerlanneqareerput.
Illoqarfinni assigiinngitsuni innuttaasut namminneq sulerusussusaat nukissaqassusaallu aallaavigalugit tapersersuisinnaavugut. Matumanili pingaarnerpaavoq innuttaasut namminneq imminortarneq pinaveersaartinniarlugu suliniutit assigiinngitsut aallartinniarnerini akisussaaffinnik agguataarinnittarnissaat, tamatumanilu uagut ikiortiserineqarsinnaavugut. Illoqarfinni innuttaasut qanimut suleqatigalugit aatsaat pinaveersaartitsineq kimilik ingerlanneqarsinnaavoq. Ilimaginngisatsinnit tamatta nukittunerusarpugut. Pisortat aaqqiissuteqarnissaat utaqqiinnarnagu tamatta inooqatigiinnitsinni iliuuseqarsinnaanissarput pikkoriffiginerusariaqarparput, imminortarneq pinaveersaartinniarlugu suliniutinik ataqatigiissaarisoq Jette Eistrup oqarpoq.
Jette Eistrup naggasiilluni oqarpoq kikkut tamarmik peqataaffigisinnaasaanik, Cafemetode-mik taallugu, tassa kaffisorusaajutigalugu oqallittarneq ingerlanneqartartoq, taamatullu aaqqissuussisarneq pissarsissutigilluarneqartartoq.
