Imminortarneq pillugu iliuuseqarneq Canadami malunnartinneqarpoq
Imminortarneq Canadami inuit akornanni mikinngitsumik ajornartorsiutaavoq, sualummik angutit inuusuttut akornanni. Canadamiunut allanut naleqqiullutit inuit arfineq-pingasoriaammik amerlanerit imminortarput.
Tamanna tunngavigalugu canadami inuit peqatigiiffiisa kattullutik canadami inuit akornanni imminortarnerup millisarneqarnissaa suleqatigiiffigilerpaat.
Suleqatigiinnerlu aallarnerlugu ippassaq Canadami inatsisartut ataatsimiittarfissuata silataani inuit 200-t missaat katersuupput takutinniarlugu inuit inuunermut unnersiutiginneriaasaat. Katerisimaartitsinermi nuannaffiusumi, inngertoqarpoq inuillu pinnguaatitoqaannik takutitsisoqarluni. Imminortarneq pillugu iliuuseqarnermut ullorititami ilaatigut erinarsortartoq Susan Aglukark oqalugiarpoq. Taanna ilaatigut oqarpoq inuusuttut iluatinnartuummata atorfissaqartinneqarlutillu imminornissaat suna tamaat atorlugu pinaveersimatinneqartariaqartoq. Susan Aglukark imminortarnermut tunngasunik kinguaassiutitigullu atornerluneqarnermut tunngasunik arlalinnik nammineq erinarsuusiaqarpoq immiunnikuusaminik. – Kissaatigaara inuuneq tunissutisiarput unnersiutigissagipput aammali pingaaruteqarpoq imminorlutik peerussimasut puijunnginnissaat, Susan Aglukark oqarpoq.
Mary Simon, peqatigiiffimmi Inuit Taperiit Canadami siulittaasuusoq oqaaseqartunut ilaavoq. Taanna oqarpoq piffissanngortoq canadami inuit imminortarnerup akiornissaanut iliuusissarsioqatigiinnissaannut. – Inuunermik unnersiutiginninneq kiisalu inuit inooriaasiannik perrualaaruteqarneq iliuuseqarusunnermi alloriarneruvoq siulleq, Mary Simon oqarpoq.
