Imminornermik eqqugaasartut

Imminortoqarsimatillugu ikinnerpaamik qanigisaasut tallimat aliasunnermik tupannermillu eqqugaasarput.

Nuummi nakorsiartarfimmi nakorsaq Gert Mulvad oqarpoq, nalaataqarnerlussimasunik ikiuiniarnermi aqqutissiuisut pisariaqartut.

- Imminortoqarsimatillugu qanigisarpassuit kalluarneqartarput, taamaammat ikorfartoqatigiinnissaq avaqqunneqarsinnaanngilaq. Nalaataqarsimasunut saaffiginniffissat pisariaqarput pilersinneqartariaqarlutillu, nakorsaq Gert Mulvad oqarpoq.

Imminorneq pinaveersaartinniarlugu suliniutinik Paarisami ataqatigiissaarisoq Jette Eistrup oqarpoq inoqatit qanoq innerat inuiaqatigiit akornanni malussariffigineqarnerusariaqartoq.

- Ilisimavarput imminornermik eqqarsaateqalerneq, inuunerup allanngortariaqalerneranut ersiutaasoq, imaanngilaq toqorusukkamik. Ilisimanerulertariaqarparput ikioqqullutik tusaaqqusut malussariffiginerulernissaat, Jette Eistrup oqarpoq.

Nunatsinni tarnip pissusiinik ilisimasallit amerlanngimmata ilisimasalinnik allanik atorluaanissaq pisariaqartoq, Nuummi nakorsaq Gert Mulvad oqarpoq.

- Tarnip pissusiinik ilisimasallit ikorfartuinissamik isumaginnittarput, nunatsinnili ilinniarsimasut amigaataaqaat. Taamaattumik tarnip pissusiinik ilisimasallit (psykologit) atorluarlugit aqqutissiuisutut atorneqarsinnaapput, soorlu niviarsianut, nakorsanut, napparsimavinni sulisunut iliniartitsisullu siunnersortitut atorluarlugit. Atorluarneqartarpullumi taamaattoqarneralu pingaaruteqartorujussuuvoq, Nakorsaq Gert Mulvad naggasiivoq.

Nalaataqarnerlussimasunik ikiuiniartartut ingerlaavartumik pikkorissartinneqartarnissaat pisariaqartoq, illoqarfinnilu amerlanerni ikorfartoqatigiit pilersinneqareersimasut Gert Mulvad oqarpoq.