Imminorneq

Angajoqqaat inuusuttortaminnik isumaginninnerusariaqarput, annerusumillu oqaloqatigisarlugit inuusuttatillu tusaaniarnerusariaqarlugit.

Inuusuttut 15-init 17 tikillugit ukioqartut akornanni imminut toqunniarnermik eqqarsaateqartut pillugit paasisat nutaat tamanna takutippaat.

Meeqqat Inuusuttullu Pillugit Ilisimasaqarfiup pinaveersaartitsinermik suliaqartoq Paarisa suleqatigalugu misissuineranni nutaaliaavoq inuusuttut taamatut artorsaateqarnerminnik suut patsisaanersut namminneq akissuteqarfigigamikkik.

Imminornerit imminoriaraluarnerillu inuusuttunit nunaqarfimmiuusunit illoqarfimminngaanneersunut naleqqiullugit ukiuni makkunani ajornartorsiortaanerusoq aamma paasinarsivoq.

1980’ikkunni paasisat najoqqutaralugit inuusuttut akornanni imminornerit imminoriaraluarnerillu illoqarfissuarmiuunerusut akornanni pisarsimapput – pissutsilli ullumikkut mumissimapput.

Nunatsinni inuusuttut 15-init 17 tungaannut ukiullit katillugit 2700 missaanniipput, taakkulu akornanni inuusuttut 508 misissuinermi ilaatinneqarsimapput.