Imminoriaatigaluni qaartartumeerivoq
Afghanistanimi Amerikamiut sakkutooqarfiisa annersaanni ullaaq imminuujutigaluni qaartitsisoqarmat sisamat toqutaapput 20-llu angullugit ikilerneqarlutik.
Qaartartumeerineq Amerikamiut præsidentiata tulliata Dick Cheney-ip tupaallatsitsilluni sakkutooqarfimmut tikeraaleruttornerata nalaani pivoq. Nunap ilaani tamaani Pakistanimi Afghanistanimilu Al Qaida-p annerujartuinnartumik iliuuseqartalernerata akerlilersorneqarnissaa siunertaralugu Cheney angalavoq.
Dick Cheney ullaaq isumannaatsumut pereersorlu sakkutooqarfiup silatinnguani imminuujutigaluni qaartitsisoqarpoq. Qaartartumeerinermi toqutaasut tassaapput Afghanistanimiu ataaseq, Amerikamiut marluk nunanilu allamiu ataaseq. Ikiligaasut tassaanerupput sakkutooqarfiup isaariaani nakkutilliisut biilinillu ingerlatsisartut.
Al Qaida-mit nalunaarutigineqarpoq qaartartumeerineq Cheney-mut saassussinerusoq, tamannali Amerikamiut upperiumannngilaat, tassami taassuma tikeraarnera isertuussaalluinnarmat.
Dick Cheney sakkutuunik ullaakkorsioqateqaleruttortoq qaartitsisoqarpoq, nalunaaquttallu akunnerata aappaata affaa qaangiummat sakkutooqarfik qimappaa ilaatigut Afghanistanip præsidentia ataatsimeeqatigisussaagamiuk.
Cheney ippassaq Pakistanimut aamma isertortumik tikeraarsimavoq. Tassa Pakistanimiut Afghanistanimiullu Al Qaida-mut talebanillu sorsuttartuinut iliuuseqanngippallaarnerat Amerikamiunit naammagineqanngimmat. Tamanna oqariartuutiginiarlugu Cheney angalavoq.
Amerikamiut Irakimi sorsunneq annerusumik aallutileruttoraat oqaatigineqarpoq Al Qaidap Talebanillu sorsuttartui Afghanistanip Pakistanillu killeqarfiisa eqqaani qaqqani pikitsitsiniat sungiusarfeqarlutillu nutaamik aaqqissuussinerarlugit. Dick Cheney-ip Afghanistanimi præsidentimut piumasariniarpaa nuna tamanna Al Qaida-mut allanullu musliminut ingasattajaarnianut Amerikamik iligisaanillu saassussiniartunut katersuuffioqqilissanngitsoq.
