Immikkut ilisimasallit ikiorsiisariaqarsorai

Suliniaqatigiiffiup Red Barnet-ip maanna siunnersuutigaa, danskit immikkut ilisimasallit nunatsinnukartillugit meeqqanut kinguaassiutitigut atornerlunneqarsimasunut kommunit sulinerannik ikiorsertariaqaraat.

- Pisussaavugut ilisimasagut neqeroorutigissallutigit, taamaalilluta Kalaallit Nunaanni naleqquttumik aaqqiissuteqarnissamut ikiuussinnaaniassagatta, taama oqarpoq Red Barnet-imeersoq tarnit pissusiinik ilisimasalik Kuno Sørensen.

Taanna taama oqaaseqarpoq ” 2004-mi Kalaallit inuusuttut atugaat” pillugit nalunaarusiami meeqqat suli 15-liisimanngitsut 28 procentii kinguaassiutitigut inersimasunit atornerlunneqartarsimanerat saqqummiunneqarmat.

- Qangali ilisimavarput, meeqqanik kinguaassiutitigut atornerluisarneq Kalaallit Nunaanni atugaaleraluttuinnartoq, ajornartorsiulli sualuttorujussuuvoq tupannarlunilu, Kuno Sørensen oqarpoq.

Misissuinerup takutippaa, meeqqat inuusuttullu kinguaassiutitigut atornerlunneqarsimasut ilaqquttamik iluanni imigassamik atorluiffiusuminngaanneersuusartut. Taamatuttaaq angajoqqaaminniit amerlaqisut timimikkut annersarneqarsimallutik. Kisitsisit taakku danskinut sanilliukkaanni danskit nivissat suli 15-liisimanngitsut 5 procentii kinguaassiutitigut atornerlunneqarsimapput.

Kuno Sørensenilu oqarpoq, Danmarkip nunattalu tassuunakkut assigiinnginnerujussuat sumik peqquteqarsimasinnaanera imaaliinnarlugu nassuiarneqarsinnaanngitsoq.

- Kalaalerpassuit inuttut ajornartorsiuteqartuupput, taamaalillutik qitornaminnik paarsinissartik ajornakusoorutigisarlugu, taamaattoqartillugu meeqqat inersimasunik allanik ujartuilersarput, ajoraluartumillu inersimasut ilaasa meeqqat pisariaqartitaat atornerlulertarpaat, Kuno Sørensen oqarpoq.

Taamatuttaaq erseqqissarpaa kinguaassiutitigut atornerluineq Danmarkimut sanilliullugu Kalaallit Nunaanni nipangiusimaneqarpallaarmat meeqqat politiinut saaffiginninnissartik paqumigilertaraat aammalu kikkut tamarmik nunatsinni imminnut nalunnginnerat peqqutaaqataalluni. Tassami inuiaqatigiinni taamak ikitsigisuni ajornartorsiutit anninnissaat annilaanngatigineqartarmat.

Danskit inunnik isumaginninnermi naalakkersuisuata Eva Kjer Hansenip tusagassiutinut nalunaarummini nunatsinni naalakkersuisut isumaqatiginerarpai.

- Danskit ajornartorsiummut tassunga periusaat atorneqartuartillugu ikiuussinnaajuassaagut, ministeri oqarsimanerarneqarpoq.