Immikkut ilisimasallip SAS-imi sukkasuumik isumaqatigiissuteqartoqarnissaanut neriuutissaqarsorigaa
SAS-ip timmisartumi aquttuminut nutaamik isumaqatigiissusiorniarsarinini aqagu aallarteqqissavaa.
Isumaqatigiinniartoqannginneranni illuatungeriit isumaqatigiissuteqangajassimasut oqaatigineqarpoq.
Sydbankimi piginneqataassutsinik misissueqqissarnermi pisortaq, Jacob Pedersen silaannakkut angallassisarneq matumani SAS pillugu qanimut malinnaasoq taama naliliivoq.
- Imminnut nassaarisoqarnissaanut neriuuteqarpunga, isumaqatigiissuteqartoqarnissaanullu ullorpassuusariaqanngillat, taanna oqarpoq.
SAS-ip timmisartumi aquttui 1000-it missaanniittut sapaatip akunnerata siuliani ataasinngornermit suliumajunnaarput.
Taakku suliumajunnaarnerat sulisitsisuminnut nutaamik isumaqatigiissusiorniarneranni isumaqatigiittoqarsinnaannginnerannik pissuteqarpoq.
Stockholmimi isumaqatigiinniarnerit nutaat
Illuatungeriit SAS-ip timmisartumi aquttunut sinniisunik nutaamik isumaqatigiinniarnissamut qaaqqusinerata kingunerisaanik Stockholmimi aqagu naapeqqissapput.
Sydbankimit Jacob Pedersenip isumaqatigiinniarfimmi siusinnerusukkut susoqarpiarnera ilisimanagu erseqqissaatigaa, taamaammat taassuma sukkasuumik isumaqatigiissuteqartoqarnissaanut neriunnera neriuuteqarnermik tunngaveqarpoq.
AAMMA ATUARUK SAS-imi suliumajunnaarneq: Apollop ilaquttaatalu timmisartoq ilaaffissaat taamaatiinnarneqartoq
- Kisianni aamma isumaqatigiissuterpassuaqartut ilisimavarput, tamannalu tunngaviliilluarsinnaassasoq neriuutaavoq, taamaalillutik SAS-ip timmisartui ullut arfinillit qulillu akornanni qaangiuppata timmisartuussileqqissinnaassallutik.
- Kisianni aalajangersimasumik ilisimasaqarnani neriuutaannaapput.
Ullormut 90 millionit missaat annaasarai
SAS-ip timmisartumi aquttut timmisartuussinnginneranni 90 millionit koruunit missaat ullormut annaasarai nalilerneqarpoq.
Timmisartumi aquttut sapaatip akunnerata siuliani ataasinngornermili timmisartuussiunnaarnerat pissutigalugu annaasai 600 millionit koruuninngorsinnaapput.