Immikkut akiliiniarneq aaqqiagiinngissutaavoq

Peqqinnissaq Pillugu Katuffik PPK isumaqatigisitsiniartartumut maanna suliassanngortitsivoq.

PPK Isumaqarpoq, Naalakkersuisut peqqinnissaqarfimmi isumaqatigiissummut tunngasumik naapeqatigiissummik kingullermik eqquutsitsinngitsut.

Peqqissaasut nunani allamiut sisamat ukiortaamiit atorfinitttussatut naatsorsuutigineqarput, taakkulu qallunaatut paasinnissinnaallutik oqalussinnasussaapput, kaallisullu oqaatsinik ilikkagaqarsimassallutik. Taamaammat oqaatsinik ilinniarnermut piffissartortussaapput. Apeqqullu pingaartoq tassaavoq, tamatumunnga immikkut akilerneqassanersut, bonusinngorlugit imaluunniit taartisiassanngorlugit.

PPK naalakkersuisullu tamatumunnga naaggaareernikuupput. Qaavatigut aningaasanik pissaarsisitsineq isumaqatigiissutinik atuuttunik unioqqutitsinerussaaq.

Tamatuminngali Namminersorlutik Oqartussani assortuutoqarunarpoq. Tassami Peqqinnissamut naalakkersuisoqarfimmi pisortaq, Ann Birkekær Kjeldsen, allaanerusumik isumaqarpoq.

Taanna KNR-imut qanittukkut oqarpoq, peqqissaasut nunani allaneersuut oqaatsinik ilinniartinneqarnerminni piffissartornerminnut tarsiiffigineqartariaqartut.

- Tamanna ilaatigut soqutigisaraarput, inuit taamannak piffissamik atuiniisamut kajumilernissaat. Tassalu atorfininnginnerini, Kalaallit Nunaannut pinninnerini, sulisussarsiuussisartut suleqatigalugit isumaginiarparput, oqaatsinik iliniarnertik pillugu arlaatigut taarsiiffigineqassasut, Ann Birkekær Kjeldsen oqarpoq.

Kisianni peqqissaasut nunani allamiut ilumut taarsiiffigineqarnissaannik oqaaseqarnini peqqissimissutigisimagunarpaa.

Radioaviisip ilanngutassiaanut naqqiissummik Namminersorlutik oqartussat nittartagaatigut ippassaq ima allagaqarpoq, pingaartumik tupigusuutineqarsimasoq ajunngitsorsiassat isumaqatigiissummik unioqqutitsisut akissarsianut nalimmassaatitut taaneqarsinnaanerat.

-Taama oqangilanga. Oqaatsit KNR-imi tusagassiortup oqaaserai, soorlu aamma qulequtaq “Akissarsianik nalimmassaanermut taarsiullugu ajunngitsorsiassat atorneqarput” tusagassiortup nammineq oqaaserigaa. Ann Birkekjær Kjeldsen allappoq.

Kisianni nammineq tallimanngormat oqaasii nutsikkavut taamaapput. Aamma erseqqissaatigissavarput, KNR naqqeeqqullugu utertitseqqulluguluunnit piumaffigineqanngimmat.

Aamma qulareqqunngilaa, nammineq peqqinnissaqarfillu soorunami isumaqatigiissutinik isumaqatigiissutigineqarsimasunik malinnissagami.

Tamannali PPK-p, Peqqinnissaq Pillugu Kattuffiup, uppererpasinngilaa. Kattufik isumaqatigiisitsiniartartumut maanna suliassanngortitsivoq.

Namminersorlutik Oqartussat isummatik ullormiit ullormut allanngortittarniarpatigit, tamanna allatut ajornartumik sulineq pillugu isumaqatigisitsiniartartumut suliaritittariaqarparput, PPK-p siulittaasua oqarpoq.