Immikkoortortaqarfiit Siverth K. Heilmannip kattunniarpai
A/S Inissiaatileqatigiiffik INI-mi inissianik attartortut ineqarnermut akiligassaminnik akiliinngitsoorsimasut ukiuni kingullerni amerliartorsimapput.
Kisitsisimmi takutippaat inissianik attartortut 6444-t INI A/S-imut katillugit 100 millionit koruunit sinnerlugit akiligassaqartut.
Attartornermut peqqussut atuuttoq naapertorlugu najugaqarfittut immikkoortortaqarfinni ataasiakkaani inissiani attartortut, immikkoortortaqarfiup aningaasartuutaanut tamarmiusumut akisussaaqatigiittussaapput. Tamannali maanna allanngortinniarneqalerpoq. Sermitsiaq taama allaaserisaqarpoq.
Partiit Inatsisartuni ilaasortaatitallit, Demokraatit kisimik pinnagit, Ineqarnermut Naalakkersuisoq Siverth K. Heilmann peqquaat ineqarnermut akiliutip aalajangerneqartarneranut malittarisassat atuuttut allanngorteqqullugit, ineqarnermut akiliutinut akilerneqarsimanngitsunut annaasat pisortat, tassa Namminersorlutik Oqartussat kommunillu, namminneq nammassagaat.
Periarfissaq alla Ineqarnermut Naalakkersuisup Siverth K. Heilmannip piviusorpalaarnerusutut isigaa, tassa immikkoortortaqarfippassuit atorunnaarsillugit, taarsiullugu pisortat inissiaataat attartortittakkat nuna tamakkerlugu najugaqarfittut immikkoortortaqarfinngortinneqarsinnaanissaat. Taamaaliornikkut ingerlatsinikkut iluaqutissartaqarsinnaassaaq, tassami akiligassat immikkoortortaqarfinnut ataasiakkaanut artukkiivallaassanngimmata.
Ineqarnermut aaqqissuusseqqittoqarnissaa Siverth K. Heilmannip siunniuppaa, akiligassaqartarneq annikillisinniarneqarluniluunnit pisarunnaavissinniarlugu, Sermitsiaq allappoq.
