Immiaaqqat Nunatsinni pisiassat akisunerpaanut ilaapput
Nunarsuatsinni immiaaqqat akisunerpaat akikinnerpaallu sumi pisiassaanersut nittartakkami nutaami atuarneqarsinnaavoq. Allattorsimaffik malillugu immiaaqqat Kalaallit Nunaanni pisiassat akisunernut qulinut ilaapput.
apriilip 19-at 2010 07:05
Immiaaqqat Kalaallit Nunaanni pisiassat akisunerpaani normu 6-itut inissisimapput. Tamanna nittartakkami nutaami pintpricemi allaaserineqarpoq.
Immiaaraq akisunerpaaq Norgemi pisiassaavoq, tassa ½ liiteri 50 koruunip missaanik akeqarluni, Nunatsinni immiaaraq ½ liiteri 41 koruunit missaannik akeqartoq.
Immiaaqqat akisugivallaaraanni sumi akikinnerpaamik immiaararsisinnaanerluni nittartakkakkut pintprice.comikkut misissuataarneqarsinnaavoq. Soorlu Vietnamimi immiaararsissagaanni ½ liiteri 4 koruuni inulaarlugu akeqarpoq, Panamamilu ½ liiteri 3 koruuni inulaarlugu akeqarluni.
Inuit nunarpassuarneersut nittartakkamut nalunaarusiortarsimapput, immiaaqqallu akii akisunerpaamiit akikinnerpaanut nittartakkami allattorneqarsimallutik.
