Immat naatsorsuutigisamit qaffannerussasoraat

Aviisimi Politikenimi ullumi saqqummersumi mianersoqqusineq allaaserineqarpoq.

Nalunaarusiami, ullumikkut saqqummiunneqartussami, Issittumi Siunnersuisooqatigiit nalilerpaat, ukioq 2100-p tungaanut immat 0,9-p 1,6-illu meterit tungaanut qaffassimassasut.

Naalagaaffiit Peqatigiit silap pissusia pillugu ataatsimiittartoqatigiivi 2007-imi nalunaarusiormatali  immat qaffakkiartorneri pillugit ilisimatuussutsikkut siunnersortit nutaanik aatsaat nalunaarusiorput.

Immat 0,9-miit 1,6 meterinik qaffanissaat ernumanartortaqartorujussuuvoq. Inuit 150 millioninit ikinnerunngitsut nunarsuatsinni immap qaavaniit meterip ataatsip missaanik qaffasitsigisumi inuusuupput, aviisimi allaaserineqarpoq.

- Immat naatsorsuutigisamit qaffannerunissaat ilisimatuussutsikkut misissuinerit nutaanerpaat takutimmassuk isumakulunnarpoq, Silap pissusaa pillugu EU-p kommissæria, Connie Hedegaard, aviisimut Politikenimut oqarpoq.

- Silap pissusaata unammillernartua tuaviortumik iliuuseqarfigisariaqaripput eqqaasinneqarpugut, Connie Hedegaard erseqqissaavoq.