Immaqa uukapaatitsiniartoqarsimavoq
Danmarkimi Aningaasaqarnermut aamma Avatangiisinut ministereqarfiit ukiuni 2001-imiit 2004-mut nunarsuup kiatsikkiartornera pillugu ilisimatusartut tunngaviusumik paasisaat allanngortittarsimavaat.
Taamaattumik ministeriunerup nassuiaateqarnissaa De Radikalinit piumasarineqarpoq.
- Tamanna uukapaatitsiniarnertut taaneqarsinnaavoq, taamatullu siornatigut pisoqarsimanngisaannarpoq, Radikalit silap pissusaa pillugu oqaaseqartartuat Martin Lidegaard nutaarsiassaqartitsivimmut Ritzauimut oqarpoq.
Danmarkimi avatangiisinik misissuisoqarfimmi siunnersortaaneq Jes Fenger, silap pissusaanut naleqqussarnissamut tunngatillugu Danmarkimi naalakkersuisut saqqummersittagaannut atuakkiortuni pingaarnersaasoq, Folketingimut ilaasortap Martin Lidegaardip isornartorsiuinera taperserpaa.
- Nunarsuup kiatsikkiartornera pillugu allaaserisama kinguarsarneqartarnerat imaluunniit allanngortiterneqartarnerat sungiutiinnarnikuuara, Jes Fenger oqarpoq.
De Radikalit ilisimatusartut isornartorsiuinerat pisoqalisoorsimanngitsutut isigaat, tassami nunarsuup kiatsikkaluttuinnarnera inunnit pilersitaasoq Danmarkimi naalakkersuisut maanna miserratiginngilaat.
Silap pissusaa pillugu allaffeqarfimmik immikkut ittumik pilersitsisoqareerpoq, tassanilu silap pissusaa pillugu 2009-mi Danmarkimi nunat tamat ataatsimeersuarnissaat piareersarneqassasoq Martin Lidegaardip oqaatigaa.
