Immap naqqatigut kabelip tallilerneqarnissaanik kinguartitsineq Siumup isornartorsiorpaa
Taamaalilluni immap naqqatigut kabelip pilersaarutigineqartutut Nuummit Aasiannut siaarneqarnissaa pinngitsoortussanngorpoq.
Aamma Aasiannit Ilulissanut radiokkut atassuteqaatip sakkortusarneqarnissaa Uummannallu Upernaviullu akornanni radiokkut atassuteqaatip tallilerneqarnissaa kinguartinneqarput, aningaasartuutissat qulakkeerneqarnissaat tamatumunnga pissutaatinneqarluni.
Tamannalu Siumup tungaanit iluarineqanngitsoq partiip politikkikkut oqaaseqartartuata Jens-Erik Kirkegaardip erseqqissaatigaa.
Aamma Tele-Postip siulersuisuini siulittaasoq kinguartitsinermut oqarasuaatinut angallattakkanut attaviit namminersortunut tunniunnerisigut Tele-Postip isertitakinnerulernissaanik Tele-Postillu inoqarfinnut innuttakitsunut internettimik pilersuinikkut aningaasatigut annaasaqarnissaanik tunngavilersuuteqaraluartoq taama isumaqarpoq.
AAMMA ATUARUK Immap naqqatigut kabel Nuummiit Aasiannut ilaneqarnissaa kinguartinneqarpoq
- Immitsinnut aperisariaqannginnerluta namminersortunngorsaaneq piviusorsiornersoq nunami Kalaallit Nunaattut ittumi, Jens-Erik Kirkegaard taama aperivoq.
- Immaqa nunani Kalaallit Nunaattut ittuni suna tamarmi namminersortunngorsarneqarsinnaanngilaq. Nalunngilarput internetti amigartoorfiulluni ingerlasoq, aamma assersuutigalugu Savalimmiuni taamaappoq, naak nuna mikineerarsuugaluartoq, Jens-Erik Kirkegaard taama oqarpoq.
AAMMA ATUARUK Kirkegårdip sullissinermik ammaassineq apeqqusersorpaa
Siumup tusagassiorfinnut nalunaaruteqarluni Naalakkersuisut kajumissaarpai suliaqarfimmi piaartumik aaqqiissuteqaqqullugit, internettip inuiaqatigiinni pingaaruteqaleraluttuinnarnera, soorlu innuttaasunik kiffartuussinermut, ilinniartitaanermut, ungasianit nakorsiartitsinermut aammalu sunngiffimmi periarfissanut nutaanut Netflixitut ittunut tunngatillugu.
- Qularnanngilaq innuttaasorpassuit Maniitsumit avannamut internettip periarfissarititai atorluarnerunissaat qilanaarigaat, Siumup politikkikkut oqaaseqartartua Jens-Erik Kirkegaard taama oqarpoq.
