Immap naqqatigut kaabeli Nuummut tulaanneqarpoq
Immap naqqatigut kaabeli Nuummut umiarsuarmit Il de Seinemit ullaaq tulaanneqarmat, inuppassuit Nuummi Saqqarlerni katersuussimapput. Tele Greenlandimi siulersuisuni siulittaasoq Kaj Egede persuarsioqaluni sinerissami internetikkut aqqutit sukkassussaasa assigiinnerulissaannik neriorsuivoq.
Allattoq Louise M. Kleemann
septembarip 11-at 2008 09:29
- Ulloq nuannaarfiuvoq, suliaq annertooq Tele Greenlandip siulersuisuisa teknikerillu ulapputigisimasaat naammassivoq. Immap naqqatigut kaabeli Kalaallit Nunaanni innuttaasunut pingaaruteqarluinnartussaavoq, innuttaasut, pingaartumik inuusuttut, internetip sukkassusaata teknikkikkullu atortorissaarutit nunanut allanut nallersuunneqarsinnaanngornerat tulluusimarutigisinnaalissavaat, Kaj Egede oqarpoq.
Immap naqqatigut kaabeli Nuummi Qaqortumilu taamaallaat iluaqutigineqalissanngitsoq Kaj Egede neriorsuivoq.
Immap naqqatigut kaabelip Nuummut apuunneqarnera kaffillernermik Nuummilu innuttaasunik tunissutissanik tunisinernik nalliussineqarpoq. Immap naqqatigut kaabeli 4.700 kilometerisut takitigivoq 750 million koruuninillu akeqarluni.
