Immap naqqa pillugu atsioqatigiinniarput
Savalimmiut, Island Norgelu aalisarsinnaatitaaffitsik killeqarfiisa saniatigut imartami immap naqqanik piginnittussaaneq pillugu isumaqatigiissummik atsioqatigiissangatinneqarput.
Naalagaaffiit Peqatigiit FN-ip sapaatip akunnerata tulliani New Yorkimi ataatsimeersuarnerani Savalimmiut Island Norgelu atsioqatigiinnissaat ilimagineqarpoq.
Nunat taakku pingasut atorfilittai suleqatigiillutik isumaqatigiissusiorput, Savalimmiuni naalakkersuisunut siulittaasoq Jóannes Eidesgaard oqarpoq.
Isumaqatigiissutigineqartussaq 100.000 kvadratkilometerisut annertutigaaq, Savalimmiullu avannaata tungaaniilluni, Islandip Norgellu akornanni.
Nunanut allanut politikki Savalimmiormiunit nammineq tigummineqanngilaq, Danmarkip tamanna isumagisarimmagu, ukiunili kingullerni Savalimmiormiut annertunerusumik pisinnaatitaaffeqaleriartorsimapput, isumaqatigiissutigineqartullu Danmarkip nunanut allanut ministerianit Per Stig Møller-imit atsiorneqartartussaapput.
