Immap kissarnerulernerata sermit sukkanerusumik aakkiartortippai
USA-mi Woods Hole Oceanographic Institutionimi nutaamik misissuisoqarneratigut taama inerniliisoqarpoq.
Nunarsuatsinni imavissuit maanna ukiumut 3 millimeterinik qaffariartarput. 1960-ikkut aallartilaarneranni qaffiartarnerat 1,8 millimeteriinnaagaluarpoq. Ukiuni qulikkaartuni kingullerni Nunatta sermersuata aakkiartornera marloriaat sinnerlugu annertuseriarsimavoq, tamannalu Nunarsuup kiatsikkiartorneranik patsiseqartoq, ilisimatuut oqaatigaat.
Ilisimatuut 2008-mi aasakkut kangerluup Sermillip avataani, Tunumi Helheimip sermiata imaanut atasumik sermitallip avataani uuttortaapput. Tamaani imaq sermimut annguttartoq pingasunik sisamanilluunniit kissassuseqartarpoq - tamannalu sermip imaanut atasup sukkanerusumik aakkiartortinnissaanut naammappoq.
Nunatta sermersua ima angitigaaq, tamakkerluni aakkaluarpat, nunarsuatsinni imavissuit 6 imaluunniit 7 meterinik qaffariassallutik, nutaarsiassaqartitsiviit AFP aamma Ritzau taama allaaserisaqarput.